Сумар дня на 27. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 27. грудня/децембра 2022 р.

Світовый Конґрес Русинів жадат заперестати переслідувати Русинів жыючых на Украіні і узнати іх нацийональны права

Світовый Конґрес Русинів принял выголошыня, в котрым звертат ся до премєра Словацкой Республикы Едуара Геґера і жадат перестати переслідувати Русинів на Украіні і узнати іх нацийональны права. Конґрес звертат ся до словацкого премєра з той причыны, же орґанізация єст зареґіструвана як раз на Словациі. Выголошыня буде тіж передане до президенткы Словациі Зузаны Чапутовой, міністра заграничных діл і европейскых справ Словацкой Республикы Растіслава Качера та ведучой Европейской Комісиі Урсулі фон дер Ляєн. Члены Світовой Рады Русинів за окремы державы пропонуют выголошыня послати і до власти своіх держав. СКР в выголошыню выражат своє занепокоіня звязане з діянями Службы Безпекы Украіны взглядом Русинів і артефактів русиньской культуры, што были неоправдано означены як доказы диверсиі прямованы проти територияльній інтеґральности Украіны, мимо же Русины на Украіні і в інчых державах одсудили войну, означыли як аґресора Росийску Федерацию і выразили солідарніст з Украінцями і інчыма нациями жыючыма на Украіні, а тіж жде на признаня меншыновых прав Русинам, што прожывают на Украіні. Ціле выголошыня чытайте на нашым портали.

Наступны грошы для трансграничных проєктів

Мож уж зголошувати своі внескы в новій едициі проґраму Інтерреґ Польска-Словация. 22. грудня/децембра Міністерство Фондів і Реґіональной Політикы одкрыло першы конкурсы на проєкты з унійного проґраму. Як мож чытати на сайті міністерства, до роздиспонуваня єст понад 52 млн евро, в тым 20 млн евро на модернізацию доріг. Цілю проєкту єст підпераня амбітных, цікавый трансграничных думок, котры спричынят економічный розвиток, але тіж інтеґрация жытелів по обох странах границі. Унійне дофінансуваня буде предовшыткым підтримувало проєкты, што будут тыкати такых тем як пристосуваня до змін климату, охорона природы і охорона біоріжнорідности ци поправа трансграничной дороговой інфраструктуры. Актуальный буджет при тым наборі то 32,7 млн евро. Внескы мож зголошувати до 31. марця 2023 р.

Ци Ґорлиці будут мати наступну обводницю?

Сут грошы на зрыхтуваня концепциі полудньовой обводниці Ґорлиц. Повітове місто уж має проблем з корками і великым транзитовым рухом через місто. На тоту ціль грошы будут переднаы з державного буджету. Нова траса мала бы возникнути в рамках державной дорогы но. 28. Як поінформувала єдна з посланкынь з ґорлицкого повіту, концепцийны працы то наступный, барз важный крок в страну реализациі проєкту. Головном цілю єст як найскорше переложыти ідею на проєкт. Што найважнійше – готова концепция буде скоро передана для соспільных консультаций, жебы при будуваню проєкту мали голос тіж жытелі. Траса вела буде не лем через місто, але тіж ґміну Ґорлиці і ґміну Санкова.

Закінчыл ся другій етап консультаций в справі нового желізницьового получыня

Іщы лем днес до пілночы мож выполнити дальшу анкєту тыкаючу створіня желізницьового получыня Ліґниця-Любін-Ґлоґів. То уж другій етап консультаций з жытелями Польковиц. В новій анкєті находит ся пят можливых вариянтів будовы новой леніі, разом з мапами. Мож ю выполнити на офіцияльным сайті ґміны Польковиці. Третій етап консультаций заплянуваный єст на липец/юлий 2023 рока. Проєкт аґломерацийной желізниці закладат переізды потягів зо скорістю 120 км/г через полністю зелектрифікувану трасу, што получыт Ліґницю, Любін, Польковиці і Ґлоґів.