Сумар дня на 26. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 26. вересня/септембра 2024 р.

Близко 1 млб евро на святкуваня 80. річниці Карпато-Дукляньской Операциі

Міністерство Обороны Словацкой Республикы передаст близко 1 млн евро на святкуваня 80. річниці Карпато-Дукляньской Операциі, котре одбуде ся неодолга, бо 6. жолтня/октобра. Празднуваня проходят каждого рока на Дукли і в Свиднику. В рамках святкуваня буде презентувал ся Воєнный Музей, котрый находит ся в Свиднику і Авіяцийна Техніка Озброєных Сил Словацкой Республикы. Карпато-Дукляньска Операция была найвекшом і найкырвавійшом битвом леніі східнього фронту, котра єст повязана з територийом днешньой Словациі. 6. жолтня-октобра є принятый на Словаці як Ден Героів Карпато-Дукляньской Операциі.

В Мушыні будут пошырювати Родинный Парк «Башта»

Веце як 4 млн зл буде перезначеных на розбудову Родинного Парку «Башта» в Мушыні. Рішыл про тото Заряд Малопольского Воєвідства вчас 22. засіданя, котре прошло в віторок 24. вересня/септембра тр. Середкы на розбудову Парку походят в Европейскых Фондів. Обсяг інвестициі обнимат орґанізацию пляцу забав, малой архітектуры, зрыхтуваня безпечных верхніх верств, сіт стежок до спацеруваня ци монтаж моніторінґу. В Парку появлят ся лавкы, лежакы, пікніковы зоставы, кошы, стоякы на роверы, сідиска, гойдавкы, буде замонтуване ґратя до тренуваня, спинцуваня по стінці, в рамках пленеровой силовні. Буде проведеный ремонт теперішньой альтаны і одбудова джерела воды. Побудуют додатковы перґолі на рослинніст. Заряд воєвідства рішыл тіж підперти выбраны позаурядовы орґанізациі – фінансовы середкы підут м.ін. на музичне видовиско «Кардинал Вышыньскій Незломный Примас» ци на концерт «Звукы Памяти – Фортепіяновый Концерт в Памят Йоана Павла ІІ».

Актуальны подіі в войводіньскых Русинів

Днес в просторах Школы Петро Кузмяк в Рускым Керестурі в Войводині проходит промоция книжкы «Рускій язык медже карпатскыма славяньскыма языками і діалектами» авторства Тамары Хомы. Публикацию печатала Руска Матка. Зас пару днів пізнійше, в неділю 29. вересня/септембра, тіж в Рускым Керестурі пройде подія пн. Стріча сел на Михалово Літо. Подія буде святкуваньом 190. річниці основаня Здружыня Ремісників. Презентувати будут ся розмаіти ремісникы, майстрове практичні приближат стары загыбаючы ремесла, пак в Дому Культуры одбуде ся культурно-артистична част проґраму, з выступами дітячых ансамблі і запрошеных гостів – з Пряшівкской Руси свій выступ потвердил ансамбль Барвінок.

Закінчыня выставы «Облечыня Шляхтівскых Русинів»

Заран в Пєніньскым Музею в Шляхтовій одбуде ся презентация каталоґу «Облечыня Шляхтівскых Русинів» – выдавництва, котре кінчыт тырваючу од кінця серпня тр. выставу під тым самым наголовком. Авторком тексту єст кураторка выставы Барбара Венґляж. Речена выстава є черговом експозицийом зорґанізуваном музейом, што посвячена культурі Лемків, котры жыли до кінця 40. років в сусідніх штырьох селах: Явірках, Білій і Чорній Воді і в Шляхтовій. Презентувана выстава експонувала давне облечыня Шляхтівскых Русинів, а тіж тото, якє влияня на формуваня ся облечыня мала мода, котра панувала в сусідів. Вказано чугы з крылами, опліча, холошні, ґачы, лайбикы, гунькы і інчы. Выставу дополнюют фотоґрафіі з 30. років минулого столітя з кадрами Шляхтовой і Явірок. Презентация каталоґу зачне ся о 17.00 год.