Сумар дня на 26. січня/януара 2023 р.

Приносиме вам сумар медияльной ґрупы ЛЕМ.фм+ на ден 26. січня/януара 2023 р.

Внет більше нашых таблиц з назвами сел на Словациі

В середу 25. січня/януара словацка влада на своім засіданю схвалила нове Наряджыня Влады Словацкой Республикы, котрым выдає ся список сел і міст, в якых громадяне Словациі, што належат до нацийональных меншын, творят найменьше 15% населіня. В даных селах і містах меншыны мают право хоснувати меншыновый язык в урядовым контакті. Чысло такых сел і міст ся тым самым збільшыло. До той поры было на Словациі 638 сел і міст, де мож было хоснувати меншыновый язык, тепер іх буде о 125 веце. Веце будут мати і Русины.Так само знижыл ся процент потрібный до того, жебы дане село або місто могло мати статус меншынового. Дотепер было треба, жебы ґу меншыні приголосило ся хоц лем 20%, тепер старчыт лем 15%. Русины мали дотепер 66 сел означеных по русиньскы, але уж од 1. марця будут мочы мати дальшых 88 сел, што цілковито даст суму 154 місцевости з двоязычныма означынями, словацко-русиньскыма.

Стріча в президентскым палаци

Вчера польска президентска пара запросила на дорічну стрічу представників Костелів і конфесийных звязків в Польщы та членів Спільной Комісиі Уряду та Нацийональных і Етнічных Меншын. Президент Анджей Дуда бесідувал о зрозумліню і толеранциі, з яком підходят до себе тепер власти одповідальны за долю держав і наций – тепер, в тій части Европы. По Президенті голос забрали: архієпископ Станіслав Ґондецкій – Ведучый Польского Єпископату, єпископ Анджей Маліцкій – Презес Польской Екуменічной Рады, Міхаель Шудріх – Головный Рабін Польщы, Томаш Міскєвич – Ведучый Мусульманьского Реліґійного Звязку в Польщы та Григорий Куприянович – Спілведучый Спільной Комісиі Уряду та Нацийональных і Етнічных Меншын. Присутны на стрічы были так само владыкы православной і грекокатолицкой Церкви. Участ вязл і представник Лемків в Спільній Комісиі – проф. Штефан Дудра. Запрошыня президента не приняли представникы німецкой меншыны на знак протесту на ограничыня чысла лекций німецкого языка.

Нова книжка о східній Лемковині

Выдавництво Лібра інформує, што мож уж в передпродажы придбати книжку Губерта Оссадника під наголовком «Медже Ославом а Ясьолком. Східня Лемковина в роках 1918-1938». Історично-етноґрафічне студиюм м.ін. представлят Лемків з іх політичном, соспільном і економічном активністю, конфесийны односины, обряды, традициі, описує выбраны елементы материяльной культуры, головно на основі материяльів Музею Народного Будівництва в Саноку ци з выкорыстаньом учытельскых анкєт. Др Губер Оссадник єст істориком, реґіоналистом і цертифікуваным куратором МНБ в Саноку. Книжку мож купити на сайті выдавництва Лібра.

Словацкє референдум без успіху

В минулу суботу, 21. січня/януара, на Словациі одбыло ся референдум. Словацкы громадяне могли рішыти о зміні конституциі. Звіданя было, ци громадянин є згідный з тым, жебы передвчасне закінчыня выборчого періоду Нацийональной Рады Словацкой Республикы было мож реализувати референдум або узнесіньом Нацийональной Рады. Референдум было неуспішне, кєд же взяло в ним участ лем 27,25% з тых, котры мали право голосувати, і не была сполнена границя 50%, яка є потрібна до того, жебы голосуваня было важне. Загальнодержавны результаты участи сут інчы, як результаты участи нацийональных меншын. Русины мали в референдум высшу участ, як было цілословацкє середнє чысло, члены ромской ци мадярской меншыны зас низшу. Покля на цілодержавным рівни участ была дакус понад 27%, в русиньскых селах участ досягла аж 44%.