Сумар дня на 26. січня/януара 2021 р.

Приносиме вам сумар медияльной ґрупы ЛЕМ.фм+ на ден 26. січня/януара 2021 р.

Початок спілпрацы курортны ґміны з Підкарпатя

Курортны ґміны з Підкарпатя злучыли силы і спільні написали внесок о дофінансуваня з Реґіонального Операцийного Проґраму 2014-2020. Бесіда гев о понад 7 мілийонах зл. на поправу курортной інфраструктуры. То уж другій набір внесків оголошеный через Маршалківскій Уряд. Так зродила ся думка спільной аплікациі штырьох ґмін Підкарпатя Горинця-Здрій, Івонича-Здрій, Рыманова і Солины. Лідером проєкту єст ґміна Рыманів з бургомайстром Войцєхом Фарбаньцом на челі. Представленый проєкт отримал найліпшу мериторичну оціну, завдякы чому нашол ся на переді ранкінґовой листы і має найбільшы шансы на отриманя дофінансуваня. Заплянуваны в курортах інвестициі выносят понад 9 млн. зл., з чого самоуряды рахуют на понад 7 млн. зл. підпоры. Ґміны заплянували ріжны інвестициі, котрых цілю єст розвиток лічничой інфраструктуры та притягніня новых туристів і курациюшів. Як передал редакциі Nowiny24 бургомайстер Фарбанец, надіє ся же до штырьох підкарпатскых ґмін долучыт наступна, ґміня Дембіца з курортом в Лятошыні і разом будут аплікувати о дофінансуваня з новой унійной перспективы 2021-2027.

Нова експозиция Бічской Бібліотекы

В Бічу повстала стала експозиция вказуюча історию бічскых Жыдів. Експозиция находит ся в підземлях Бічской Бібліотекы, в будинку котрых перед ІІ світовом войном полнил функцию синаґогы. Близко 70 років тому місто катів тішыло ся жытелями двох культур прожываючых попри собі. Нова експозиция єст ґестом памяти, навязуючым до того періоду. Цілю експозициі єст пошыряти знаня на тему істориі Жыдів в Бічу, вказуючы єй в інчый споіб – так, жебы скінчыти зо стереотиповым думаньом о іх традициі. Выстава єст барз модерна. В збірці находят ся німы як і звуковы фільмы та архівальны фотоґрафіі і памяткы звязаны зо спадковином бічскых Жыдів. Проєкт і концепция сут овочом працы Каролины Чех і Пьотра Дибіляса, а координатором цілого проєкту єст Ельжбєта Кнапік, директор Бічской Бібліотекы.

Перше баданя стану повітря в ґміні Мушына

В курортній ґміні Мушына прошло перше в ґміні баданя стану повітря. Вшытко в рамках заповіданой через власти ґміны акциі звязаной з провірком, чым жытелі палят в своіх пецах. До акциі схоснуваный был дрон выпосаженый в модерну технолоґію анализуваня складу повітря. Перша част акциі прошла в місті Мушына і околичных селах. Результаты сут оптимістичны, в більшости баданых місц занечыщыня не перекрачали дозволеной нормы. Як заповіл бургомайстер ґміны Мушына, Ян Ґольба, з думком о здоровля жытелів ґміны, акциі того рода будут повтаряны.

Ци того рока явит ся дакє выріжніня для книжкы про Лемків?

Зачала ся IХ едиция конкурсу о Нагороду імени священника проф. Болеслава Кумора, орґанізуваного Соспільно-Культурным Товариством «Сандеччан» при підпорі порталю і місячника «Сандеччан». Зголошыня приниманы сут до 6. лютого/фебруара 2021 рока в двох катеґориях: книжка о Сандеччыні та сандецкій автор. Цілю конкурсу єст пошырювати ріжного рода книжкы выданы в 2020 році, якы звязаны з Сандеччыном, та промувати і нагороджувати авторів родженых або прожываючых на обшыри Сандеччыны. На лавреатів обох катеґорий і выріжненого, котрый выграт в голосуваню чытачів, ждут фінансовы нагороды і памятковы статуі. Оголошыня результатів пройде 27. лютого/фебруара. Каждого рока серед номінуваных до нагороды выдавництв находят ся і тоты звязаны з лемківском темом.