Сумар дня на 26. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2022 р.

Ропу і Шымбарк получыт пішо-роверова лавка

Медже Ропом і Шымбарком буде побудувана пішо-роверова лавка. Ґміна Ропа підписала догваріня з выконавцьом в минулый віторок, 23. серпня/авґуста. Заплянувана будова пішо-роверовой лавкы є елементом шыршой задачы, яком єст будова біциґльовой стежкы з центра села Ропа до границі з Шыбмарком. Середкы на реализацию задачы ґміна отримала з Урядового Фонду Локальных Інвестиций. Цілковитый кошт будовы лавкы медже Ропом і Шымбарком то близко 440 тис. злотых. Інвестиция мала бы быти завершена до кінця того рока.

В Берегах Выжніх на Підкарпатю одкрыют фундаменты неістнуючой церкви

Як подали працівникы Бєщадского Нацийонального Парку, на Підкарпатю в Берегах Выжніх зачали ся працы при одкрытю фундаментів неістнуючой церкви. В 1946 р. жытелі села были выселены на радяньску Украіну і вшыткы забудуваня были знищены. Церков згоріла, остали лем фраґменты фундаментів і камінны плыты. Працы при одкрытю фундаментів веде соспільно Стоваришыня Активных Глядачів Істориі «Карпаты», в консультациі з Бєщадскым Нацийональным Парком. Давный цмонтір, находячый ся безпосередньо при руінах церкви, єст удоступненый для звиджаня. Є він при вході на природничу стежку «Цариньска Полонина». Працівникы Парку просят звиджяючых быти в тым місци осторожным.

15. Театральны Стрічы Інновиця 2022

Од 1. до 3. вересня/септембра в Новици буде проходила 15. едиция Театральных Стріч Інновиця 2022. Тридньовый проґрам фестівалю выполненый є предовшыткым театральныма представлінями, в тым для діти, але найти мож і музичны пропозициі ци інчы товаришучы подіі, такы як варштаты малюваня на шклі ци выстава фотоґрафій. Вступ на подію дармо, але орґанізаторы просят о фінансову підпору. Подія отримала в тым році дофінансуваня Міністерства Культуры, Нацийональной Спадковины і Спорту та Фонду Польско-Німецкой Спілпрацы. Жебы зреализувати плянуваный проґрам, потрібных єст іщы ок. 7 тис. злотых. З той причыны Стоваришыня одкрыло колекту на сайті zrzutka.pl. До кінця колекты іщы лем три дни, але на жаль не повело ся ім іщы зобрати цілой потрібной квоты. Як пишут орґанізаторы на сайті колекты, тогорічна едиция буде мала вынятковый характер, кєд же з причыны несподіваных зовнішніх проблемів вшыткы подіі будут проходити в пленері. Не поведе ся запрезентувати спектаклів, якы передвиділи в закрытым просторі. За орґанізаторами, фестіваль єст правдивым артистичным феноменом і хыбаль єдным з остатніх в державі соспільні орґанізуваных «свобідных фестівалів».

«4 Страны Карпат» уж в тот вікенд

Од заране в Ґорлицях буде проходила 8. едиция фестівалю «4 Страны Карпат». Окрем фольковых концертів буде мож обзерати выставы фотоґрафій, взяти участ в плястичных варштатах і фольк-кєрмешу. В другій ден фестівалю на ґорлицкым рынку буде мож почути і лемківску музику, за справом авторского музичного проєкту Мирослава Боґоня пн. LemJazz. Ґрупа запрезентує получыня лемківскых і украіньскых мелодий з елементами джазу. Фестіваль был выріжненый промоцийным символом Карпатінґ.