Сумар дня на 26. мая 2023 р.

Приносиме вам сумар медияльной ґрупы ЛЕМ.фм+ на ден 26. мая 2023 р.

Просиме на соспільны консультациі

Стоваришыня «Руска Бурса» в Ґорлицях і Стоваришыня Лемків просят на соспільны консультациі в справі вписаня на Державный Спис Нематерияльной Культурной Спадковины лемківского языка і лемківской культуры. Стрічы одбудут ся в Ліґници і в Ґорлицях. Перша, в Ліґници, пройде в середу 7. червця/юнія о год. 18.30 в Collegium Witelona. Друга стріча пройде в суботу 1. липця/юлия о 15.00 год. в нашій Рускій Бурсі в Ґорлицях. Консультациі сут одкрыты для вшыткых Лемків, котры ідентифікуют ся з лемківскым языком і лемківском культуром.

49. засіданя Выбору про нацийональны меншыны і етнічны ґрупы

В середу 24. мая тр. одбыло ся 49. засіданя Выбору про нацийональны меншыны і етнічны ґрупы Рады влады Словацкой Республикы про людскы права, нацийональны меншыны і родову рівніст. Важным пунктом проґраму была інформация o річным оцініню роботы нацийональных музеів на Словациі за 2022 рік. Діяльніст Словацкого Нацийонального Музею – Музею Русиньской Культуры в Пряшові была оцінена позитивно. Но русиньскы представникы в выборі, Петро Медвідь і Мілян Ян Піліп, звернули увагу і на потребу реконструкциі обєкту, з чым згодил ся ґенеральный директор. На тот момент до Міністерства Фінансів был поданый проєкт на технічну документацию потрібну для реконструкциі в квоті піл млн евро, аж пак буде мож жадати середків на реконструкцию. Окрем інчых, бесідувана была і тема концепциі нового адміністративно-територияльного діліня Словацкой Республикы. Русиньскы представникы звернули увагу, же при лучыню окресів можут меншыны прити о языковы права, котры днес мают на окресным рівни. Про результаты і другы пункты стрічы чытайте в дописі на нашым портали.

Карпаторусиньскій Америцкій Центр принял новых членів

Добры вісти плынут до нас з Америкы. Як поінформувал еміґрацийный діяч Андрий Медвід, 21. мая першый раз од долгого часу до Карпаторусиньского Америцкого Центра приняты были новы члены. ”21. мая 2023 р. Карпаторусиньскій Америцкій Центр в Йонкерс в Новым Йорку мал річне зобраня. Першый раз по вельох роках приняли сме новых 14 членів” – бесідувал Андрий Медвід. Карпаторусиньскій Америцкій Центр «Lemko Hall» протягом рока орґанізує подіі, на котрых стрічают ся нашы родакы, еміґранты, а і іх потомны, якы ся уж родили на американьскій земли. Орґанізация рыхтує м.ін. традицийны пікнікы з нагоды Русаля, ци шторічный осінній «Лемківскій Кєрмеш». Члены не забывают ани і дбают о сохраніня памяти про траґічну долю лемківского народу. Приміром в минулым році лемківскы еміґрацийны кругы в Америці одзначыли 75. річницю выселіня Лемків в рамках Акциі «Вісла». Тішыме ся, што орґанізация притігат новых членів, а памят родаків про Лемковину фурт не загыбат.

Привернена контроля на словацкых границях

В середу 24. мая Словация привернула контролю на границях з Польщом, Чешском Республиком, Австрийом і Мадярами, та на аеропортах. Ситуация потырват до 8. червя/юнія. Рішыня єст звязане з медженародном конференцийом безпекы Globsec, котра пройде кінцьом мая в Братиславі. Границю зо Словацийом мож тепер перекрочыти лем на вызначеных граничных переходах. Треба памятати, жебы мати зо собом документы подорожы – особистый документ або пашпорт.

Джерело фотоґрафіі: Карпаторусиньскій Америцкій Центр