Сумар дня на 26. мая 2022 р.

Приносиме вам сумар медияльной ґрупы ЛЕМ.фм+ на ден 26. мая 2022 р.

Вікендовы концерты 10. Русиньского Фестівалю во Свиднику

Тырват ювілейна 10. едиция Русиньского Фестівалю. Уж заран о год. 18.30 зачнут ся выступом дітячого ансамблю Зборівчата головны концерты во свидницкым амфітеатрі. Пак выступит конкурс Орфеус при участи Марияна Чековского, дальше знана Лемкам в Польщы ґрупа Руснак’с з Пряшова, а на конец буде кус міцнійшой музикы, кєд же на сцені вкаже ся DJ. В суботу і неділю так само будут проходити концеры. О проґрамі дальшых дни будеме інформувати в заранійшніх новинах.

Русиньска деревяна церков в Празі не буде скоро одбудувана

В пражскій Загороді Кіньскых в жолтни/октобрі 2020 р. згоріла деревяна церков св. Михала, котра была з ХVII ст. і походила з Підкарпатской Руси. Церков перенесли до Прагы в 1929 р. Такой по тым, як церков згоріла, было зорґанізуване і збераня грошы, жебы храм одбудувати. На жаль, по більше як пілтора рока церкви ани не зачали реконструувати. Покля што обєкт лем вкрыли конструкцийом і більом плахтом. Одбудову церкви має забезпечыти пражскій маґістрат. Є надія, што даякы позволіня будут готовы до кінця того рока. Дальшый рік могли бы проходити роботы звязаны з реконструкцийом святыні. Припомнийме, што подля пожарників храм в 2022 р. хтоси підпалил. Доднес поліция не нашла винуватых.

Русины на Мадярах рыхтуют нацийональный праздник

Вседержавне Русиньскє Самосправуваня на Мадярах орґанізує в найблизшу суботу «Русиньскє Нацийональне Свято» в Еделейні, недалеко Мішкольця. Подія буде проходила в авли Грекокатолицкой Школы святого Миколая. В святі будут брати участ і цінны гості, єпарха мішкольцской грекокатолицкой єпархіі владыка Атаназ Орос і Золтан Деметер, котрый є депутатом мадярского парляменту. В рамках подіі буде передана і Премія Антония Годинкы, яку буде вручал председа Самосправуваня Віктор Крамаренко. Буде і культурный проґрам. Припоминаме, што на Мадярах списуваня жытелів буде аж того рока. І тота подія має укріпити русиньску меншыну, жебы записати собі в списуваню жытелів свою нацийональніст і материньскій язык.

Русиньска Оброда іде з концертами до реґіонів

Як інформувал Мартін Караш, ведучый Русиньской Оброды на Словациі, орґанізация приготовила серию культурно-общественных подій з назвом «Русиньскы реґіоны в місті». Найближе з русиньском культуром з реґіонів можете стрітити ся в Кошыцях в неділю, 29. мая, в просторах центру Южан. Ідейом новой сериі подій є, жебы в містах східньой Словациі презентували ся русиньскы творці і колективы з реґіонів пілнічной Словациі, котры сут населены Русинами. В недільным проґрамі, котрый буде за словами орґанізатора полный русиньского слова, музикы і танця, одпрезентуют ся Барвінок з Камюнкы, Любовнян зо Старой Любовні, Вородай з Великого Липника і Майдан з Литмановой.