Сумар дня на 26. марця 2025 р.

Приносиме вам сумар медияльной ґрупы ЛЕМ.фм+ на ден 26. марця 2025 р.

В Ґорлицхя стріча для соспільных орґанізаций

Міністра до справ Громадяньского Соспільства Адрияна Поровска та Підсекретар Стану в Канцеляриі Презеса Рады Міністрів Марек Кравчык просят представників третього сектора до участи в стрічах, якы тыкают нового Урядового Проґраму Підпертя Позаурядовых Орґанізаций на 2025 рік – «Сила Малых Соспільности». Єдна зо стріч одбуде ся в понедільок 31. марця в Ґорлицкым Центрі Культуры. Цілю проґраму з буджетом 70 млн зл єст інституцийональне підпертя малых і середніх позаурядовых орґанізаций з обшыри сел і малых місцевости, звекшыня іх одпорности через розвиток громадяньской активности, піднесіня компетенций і творіня сіти спілпрацы. На стрічы будут тіж пояснены заложыня і можливости отриманя дофінансуваня в рамках нового проґраму.

Поконференцийний збірник уж доступный

В послідніх днях вказала ся нова публикация – є то збірка рефератів, якы выголошены были вчас конференциі «Камо грядеши?»: Динамічны процесы в сучасній карпаторусиністиці. Конференция одбыла ся в вересни/септембрі минулого рока, а єй орґанізатором был Пряшівскій Університет. Цілю подіі была анализа сучасного стану карпаторусиністикы на Словациі за послідніх десят років, значыт од IV Медженародного Конґресу Русиньского Языка. Редакторами поконференцийной публикациі сут Валерий Падяк і Михал Павлич. Книжку печатало Выдавництво Пряшівского Університету. Публикация чыслит нецілых 170 стран, і 11 статій од авторів зо Словациі, Украіны, Мадяр, Канады і Зъєднаных Штатів Америкы. Медже авторами сут м.ін. проф. Павел Роберт Маґочій, Анна Плішкова, Володимир Фенич ци Мариянна Лявинец-Уґринь. Книжка єст тіж доступна в онляйновій формі на сайті Інституту Русиньского Языка і Культуры Пряшівского Університету.

Studium Carpatho-Ruthenorum 2025

Тота же інституция оголосила набір на 13. едицию Медженародной Літньой Школы Русиньского Языка і Культуры Studium Carpatho-Ruthenorum 2025. В тым році літня школа буде проходила в днях од 8. do 28. червця/юнія. Studium Carpatho-Ruthenorum то шторічный едукацийный проґрам заміряный на вчыня русиньского языка, істориі, літературы, культуры і етноґрафіі карпатскых Русинів. Лекциі ведены сут в русиньскым і анґлицкым языках і берут в них участ ученикы з ріжных держав. Інститут Русиньского Языка і Культуры Пряшівского Університету реализує проґрам од 2009 рока. Є то єдина того типу школа на світі. Участ в ній мож взяти без огляду на вік, походжыня ци дотеперішню освіту. Проґрам обнимат парудесят клясичных лекцийных годин, але тіж цілый шор додатковых атракций, як презентациі фольклору, прогулькы, театральны і фільмовы вечеры, варштаты і інтеґрацийны стрічы. Ціна курсу обнимат 3-тыжньову школу, закватеруваня і ідло та вшыткы білеты вступу і інчы оплаты.

Веце грошы на діяня позаурядовых орґанізаций од Ґорлицкого Повіту

Рада Ґорлицкого Повіту приняла схваліня тыкаюче Річного Проґраму Спілпрацы Ґорлицкого Повіту з позаурядовыма орґанізациями та інчыма підметами, якы ведут діяльніст публичного хосну. В тым році будут высшы середкы на реализацию публичных задач в обшыри культуры, охороны культуры і традиций та розвитку нацийональной і культурной свідомости – староство перезначыло 101 тис. зл на дофінансуваня культурных подій, та 85 тис. зл на дофінансуваня подій з обшыри спорту. Реґулямін признаваня тзв. малых ґрантів находит ся в Бюлетині Публичной Інформациі Ґорлицкого Повіту.