Сумар дня на 26. марця 2024 р.

Приносиме вам сумар медияльной ґрупы ЛЕМ.фм+ на ден 26. марця 2024 р.

Стоваришыня Осіб Шлезской Нацийональности зложыло внесок о заперестаня ліквідациі стоваришыня

Основатель Стоваришыня Осіб Шлезской Нацийональности Пейтер Длуґош поінформувал, што в пятницю 22. марця тр. зложыл до Державного Судового Реґістру внесок о заперестаня ліквідациі стоваришыня. Долучыл до него засуджыня Европейского Трибуналу Прав Чловека, котрый узнал, же Польща нарушыла в тій справі Европейску Конвенцию Прав Чловека. Стоваришыня звернуло ся о поясніня, што мают зробити, жебы орґанізация могла діяти згігно з правом. В правных актах є докладні описаный процес ліквідациі, але не стежка одверніня того процесу. За Длуґошом – по опуликуваню засуджыня Европейского Трибуналу Прав Чловека многє чысло осіб вказало заінтересуваня долучыньом до стоваришыня. В звязку з тым 2. квітня/апріля 2024 р. орґанізация урухомит інтернетовый формуляр, зас само принятя новых членів пройде по одзысканю статуту правосубєктности. Пейтер Длуґош хоче, жебы Стоваришыня Осіб Шлезской Нацийональности вернуло до мериторичной діяльности. Серед пріоритетів выміныл дальше стараня о узнаня шлезской етнічной меншыны, через новелизацию уставы о нацийональных і етнічных меншынах та о реґіональным языку.

67 річниця першого, символичного верчыня

Як што рока представникы мідьового басену в Сєрошовіцах при єдным з першых верчынь передали чест одкрывцям міди. 23. марця минуло 67 років од першого, символичного верчыня. Серед делеґатів з Польковиц был представник ґміны Польковиці, віцебургомайстер Кжыштоф Нестер разом з шефамыи двох професийных звязків KGHM. Нестер вказал ролю міди в розвитку ґміны Польковиці та честну ролю Яна Выжыковского. Серед присутных были тіж парляментаристы, представникы власти нижньошлезского воєвідствя та самоурядовці. Як підкрислил віцепрезес KGHM, што рока ґрупа святкуюча в памят докторя Яна Выжыковского єст штораз більша. За його зловами – без міди не было бы такого Нижнього Шлеска, як єст тепер.

Нова атракция в Креници

На Парковій Горі в Креници побудуют Поляну музикы і Світел та модерну видокову вежу. Першы роботы при Поляні зачнут ся уж по великодніх святах, а онедолга закінчыт ся конкурс оферт на будову вежы. За проєкт і реализацию одповідают Польскы Кабельны  Желізниці. Як передал представник ПКЖ, заплянуваных робіт не даст ся скінчыти в часі єдного сезону, але уж в наступным році туристы і жытелі міста будут мочы хоснувати новы атракциі. Обі інвестициі то кошт од 10 до 15 млн зл. Ревітализацию вершка парковой горы підперат ґміна Крениця, котра во власным закресі додатково проведе ремонт парковых стежок.

Варштаты робліня квіточків з бібулы в Рускій Бурсі

Стоваришыня «Руска Бурса» в Ґорлицях просит діти і молодіж до участи в варштатах робліня квіточків з бібулы. Пройдут они в суботу 13. квітня/апріля о 12.00 год. в Рускій Бурсі, вступ дармо. Припоминаме, што то уж другы занятя в рамках Творчой Бібліотекы – циклю стріч для діти і молодежы, вчас котрых рыхтуваны будут розмаіты ручной роботы артефакты.