Сумар дня на 26. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 26. лютого/фебруара 2024 р.

Представникы німецкой меншыны вертают до СКУтНіЕМ

В минулым тыжни, 19. лютого/фебруара, Рафал Бартек і Бернард Ґайда поінформували премєра Дональда Туска, што як репрезентанты німецкой меншыны вертают до прац Спільной Комісиі Уряду та Нацийональных і Етнічных Меншын. Члены за німецку меншыну завісили свою працу в Комісиі 1. квітня/апріля 2022 р., выражаючы незгоду на дискримінацию діти належачых до німецкой меншыны, котрым в результаті розпоряджыня товдышнього міністра едукациі Пшемыслава Чарнка были ограничены годины вчыня материньского языка з трьох годин до єдной. Близко два рокы пізнійше представникы німецкой меншыны вертают до працы в Комісиі, кєд же новы власти обіцяли привернути лекциі меншынового німецкого языка в вымірі 3 годин на тыжден од 1. вересня/септембра тр.

Чемпіонат Світа FIS в Креници

В минулый вікенд 24. і 25. лютого/фебруара в Креници проходили історичны змагяня в рамках Чемпіонату Світа FIS (Медженародной Лыжной і Сновбордовой Федерациі) в альпійскым сновборді. Тоты престіжны медженародны змаганя першыраз в істориі были розограны в Польшы. На Креницкій Яворині мож было обзерати близко 100 спортовців з 16 держав. То великє выріжніня для Крениці, котра стала на тот час зимовом столицьом світа. Певністю влине то на звекшыня туристичного руху, як і більшу розпознавальніст курорту, за справом телевізийных трансмісий о світовым засягу.

Театраьно-культурный фестіваль в Низкым Бескіді

Як поінформувала меджепоколіньова театральна ґрупа з Устя Руского, в тым році зорґанізуют першый театраьно-культурный фестіваль в Низкым Бескіді пн. UJŚCIE KULTURY. Підчас фестівалю буде мож обізрити вшыткы спектаклі ґрупы Племя, м.ін. «Бомбля» на основі книжкы лемківского писателя Мирослава Нагача, «Бескід без кіту» ци «Бескідскы Дзяды». Будут і інчы атракциі. Подія одбуде ся на зламі липця/юлия і серпня/авґуста тр. Ґрупа отримала на тоту ціль ґрант з Міністерства Культуры і Нацийональной Спадковины. Глядают тіж волонтерів, котры хотіли бы помочы в реализациі подіі.

Рекрутация на спортовы занятя для діти в Польковицях

Ґміна Польковиці веде рекрутацию на додатковы спортовы занятя для діти. Близко 500 молодых Польковичан може дармо скорыстати з вчыня плываня і корекцийно-компенсацийной ґімнастикы. Занятя будут проходити в рамках проґрамів спілфінансуваных Міністерством Спорту і Туристикы з Фонду Спортавых Занять. Сут они направлены на учеників кляс 1-3 основных шкіл, для котрых ведучым орґаном єст ґміна Польковиці. В занятях з елементами корекцийно-компенсацийной ґімнастикы можут брати участ ученикы кляс 1-6 та діти корыстаючы з річного обовязкового предшкільного выхованя. Як подає віцебургомайстер Польковиц Кжыштоф Нестер, занятя сут не лем пропозицийом заґаздуваня свобідного часу учеників, але можливістю профіляктикы в обшыри кориґуваня поставы. Окрем того діти вчат ся м.ін. безпечного корыстаня з аквенів. Жебы записати дітину на занятя – треба достарчыти до школы деклярацию і освідчыня, котры мож побрати з інтернетового сайту ґміны polkowice.eu або отримати в школах. Рекрутация тырват до 29. лютого/фебруара, а занятя зачнут ся 4. марця.