Сумар дня на 26. липця/юлия 2024 р.

Приносиме вам сумар медияльной ґрупы ЛЕМ.фм+ на ден 26. липця/юлия 2024 р.

«Од Русаль до Яна» в Зындрановій

Од заране в Зындрановій буде мож взяти участ в традицийній подіі орґанізуваній Музейом Лемківской Культуры – «Од Русаль до Яна». Подія потырват два дни. В рамках суботнього проґраму одбудут ся: звиджаня музею, пропаґуваня книжок, прелекциі і доповіди та положыня квітя, а на 18.00 год. заплянуваны сут выступы ансамблів: Терещакы, Гудакы і гудобна ґрупа Медияль. Пак буде паліня огниска. В неділю по службі в церкви св. Миколая в Зындрановій одбуде ся офіцийне одкрытя свята з привитаньом гости. Пак запрезентуют ся: капеля Дукляне, ансамблі Ленчане, Бака, Карпатія, Свидничанка, Гудакы, Ославяне і Пековці. Окрем того буде і авторска стріча з авторком «Лемківской кухні з Ріпок», показы ремесла і конкурсы.

«UjŚCIE KULTURY -Театр і горы»

А уж днес в Ждыни рушат фестіваль з назвом «UjŚCIE KULTURY -Театр і горы». Як подают орґанізаторы, меджепоколіньова театральна ґрупа Племя і Стоваришыня ім. Мирка Нагача «Білый Сокій», то штырьодньове оповіданя о Низкым Бескіді – в тій лемківскій краіні повстала ґрупа Племя, котра кормит обзераючых образами, істориями одтале. До участи в подіі запрошены были і писателі, артисты звязаны з реґіоном. На днес од 18.00 год. заплянуване єст одкрытя фестівалю, концерт «Лемко Jazz», вечеря зрыхтувана Кружками Сельскых Ґаздынь і спектакль на основі книжкы «Бомбель» лемківского писателя Мирослава Нагача. В суботу буде мож обзерати спектаклі «Бескід без кіту» на основі книжкы Мариі Стшелецкой і «Бескідскы Дзяды», взяти участ в авторскых стрічах і варштатах (м.ін. карпатскых пісен), піти на прогульку з провідником на Ротунду, ци выслухати концерту Серенчы. Спектаклі, авторскы стрічы і варштаты будут і в неділю, а окрем того в проґрамі на тот ден єст і концерт лемківской пісняркы Юлиі Дошны. В послідній ден фестівалю Юлия Дошна буде вела варштаты карпатскых пісен. А окрем того буде мож м.ін. взяти участ в біциґльовій прогульці Радоцина, і іщы раз буде запрезентуваный спектакль «Бомбель/Нагач». Полный проґрам найдете на фейсбуковым сайті меджепоколіньовой театральной ґрупы Племя.

Одкрытя видоковой вежы в Домініковицях

Так само заран о 16.00 год. пройде одкрытя видоковой вежы на Лысули в Домініковицях. Одкрытю будут товаришыти ріжны атракциі. Лысуля то верх в Низкым Бескіді, котрый граничыт з Домініковицями і Криґом. Верхом іде зеленый шляк до Вапенного і на видокову вежу на горі Фердель. Нова видокова вежа на Лысули єст высока на 32 метры і має зъізджальню долгу на 54 метры. З видоковой плятформы мож буде обзерати Низкій Бескід, Цєнжковицкє Погіря, а аж і Татры.

Вернісаж выставы образів «Дукля. Оправданя присутности»

Припоминаме і о заранішнім вернісажы часовой выставы образів Уршулі Лойко-Смоґожевской пн. «Дукля. Оправданя присутности». Вернісаж пройде в Історичным Палаци в Дукли о 17.00 год. Малярка інспірациі для творчой роботы находит в природничым і культуровым краєвиді Карпат. Робит в техніці олійного і енкаустичного малярства на полотні, батіку на гадвабі і дереві та в техніці керамічного образу. В Дукли малярству товаришыти будут поетицкы тексты.