Сумар дня на 26. липця/юлия 2019 р.

Приносиме Вам сумар медияльной ґрупы ЛЕМ.фм на ден 26. липця/юлия 2019 р.

Ліщыны зас будут окремым селом

Ліщыны – лемківскє село коло Устя Руского, сут уж близко того, жебы вернути, по роках неприсутности, на мапу ґорлицкого повіту. Через остатні рокы Ліщыны адміністрацийні приналежали Кунковій, хоц в свідомости жытелів были то все два окремы села. Днес уж нихто не памятат, як то ся стало, што Ліщыны зникнули з мап. Ініциятива, жебы вернути село на мапу, пришла в часі, коли орґанізувано консультациі в справі двоязычных таблиц, з польскым і лемківскым названьом села. В 2017 році прошли соспільны консультациі тыкаючы верніня Ліщын в іх історичных границях. Жытелі рішыли справу на так. Згоду дало тіж Міністерство Адміністрациі. Формальні Ліщыны вернут по выділіню села згідні з обовязуючыма переписами. Кошт ґеодезийных мап то аж 150 тис. зл. Війт ґміны Устя Рускє – Збіґнєв Людвін, глядат фінансуваня, жебы повело ся довершыти справу до кінця.

Выбераня ропы в Лоси

О тыжден в неділю, 4. серпня/авґуста, в Лоси пройде подія, котра дозволит перенести ся до часів найбільшого розвитку села, коли праві каждый в дакій спосіб занимал ся мазьом і гандлюваньом. Прирыхтували сме розмаіты едукацийно-сенсоричны варштаты, котры звязаны сут з Ропом – бесідує Даміан Новак з Мазярской Загороды, спілорґанізатор подіі. Напрямлены сут головні на наймолодшых участників свята. Буде мож підсмотріти процес фарінациі нафтовой ропы, збудувати злогы ропы, будут і еколоґічны варштаты повязаны з великыма катастрофами, якы выникают з вылівів ропы до океанів – додає. На обшыри Загороды зрыхтувана буде мінікопальня нафтовой ропы, з котрой діти будут мочы самодільні выбрати ропу. Імпрезі товаришыти будут конкурсы, выстава сатиричного рисунку Ропоньоска, будут стоіска з народном штуком та книжками. Завершыньом свята будут концерты – пісні Карпат выспіват соло Дария Косєк, локальны співанкы запрезентуют Руты Увиты з Юлийом Дошном, а новый фольк вкаже Оркєстра Святого Миколая. Єдным з партнерів подіі є Польска Нафтово-Ґазвоа Компанія.

Міні-Терочка концертує

В середу 24. липця/юлия ансамбль Руской Бурсы Терочка выступил на стражацкым фестині в Розділю. Русиньскы співанкы запрезентувала наймолодша ґрупа Терочкы, называна робочо міні-Терочком. Сут то парурічны діти м.ін. з Ґорлиц, Розділя, Устя Руского ци Ґладышова. Мают за собом уж першы успішны выступы в Ґорлицях і Ставишы. В найблизшым часі заспівают в Білянці в неділю, 28. липця/юлия, та в Криґу 18. серпня/авґуста. Кєрівником ансамблю є Андрий Трохановскій. Вчыня співанок получене є з руховыма занятями для наукы ритмікы, діти вчат ся тіж выступувати з мікрофоном. Пробы проходят в кажду суботу о 10.00 год. в будинку Руской Бурсы в Ґорлицях. Вшыткы діти, котры хотіли бы співати, можут долучыти до ансамблю, старчыт зголосити ся на дакотру пробу.

Ансамбль Кычера на Тыжни Бескідской Культуры

Уж заран зачынат ся 56. Тыжден Бескідской Культуры. Є то великє свято фольклору – участ в ним возме коло соткы ансамблів, то є близко 4000 выконавців. Публика, яка ся што рока громадит, то близко 200 000 люди. На зламі липця/юлия і серпня/авґуста в осмох місцевостях, од Віслы через Щырк, Жывєц, Маків Підгаляньскій, Істебну по чешскій Яблонків, звучала буде народна музика, а любителі танців будут мати нагоду пообзерати ансамблі з розмаітых кутиків світа. Заран в Віслі лемківскій фольклор вкаже Кычера, а в неділю з русиньскым репертуаром выступлят Кольоры Закарпатя в Ужгорода. В дальшых днях проґрам обнимат выступы ґруп м.ін. з Румуніі, Турциі, Сербіі, Словациі, Мадяр, Чіле, Альбаніі, Чех, Хорвациі, Канады ци Македоніі. Сутю проґраму сут выступы парудесятьох ансамблів презентуючых фолькльор Бескідів, од Шлезского, Малого, Жывєцкого по Маківскій ци Сандецкій.