Сумар дня на 25. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 25. жолтня/октобра 2024 р.

Зміны в выказах дотаций на меншыновы задачы реализуваны в 2024 році

В середу 23. жолтня/октобра тр. секретар стану в Міністерстві Внутрішніх Справ і Адміністрациі Томаш Шыманьскій затвердил зміны в выказах рекомендуваных експертами до дофінансуваня в 2024 р. задач маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка в Обшыри цільовых і підметовых дотаций. Серед задач, для котрых піднесена была квота дотациі, нашли ся і тоты реализуваны лемківскыма орґанізациями: Товариством для розвитку Музею Лемківской Культуры, Стоваришыньом «Руска Бурса» в Ґорлицях і Стоваришыньом Лемко Тавер. То м.ін. дотациі на діяльніст Музею Лемківской Культуры в Зындрановій, ци печатаня «Річника Руской Бурсы» за 2024 р. – єдиного істо наукового часопису лемківской меншыны. Полный список признаных дотаций мож найти в Сервісі Польской Республикы в катеґориі Нацийональны і Етнічны Меншыны.

Наукова сипозия в Ґорлицях про 100-літя автокефалиі Польской Православной Церкви

В найблизшый віторок 29. жолтня/октобра в Ґорлицях одбуде ся наукова симпозия до темы «Одроджены з Польском Республиком. 100-літя наданя автокефалиі Польскій Православній Церкви». Подія пройде в Сали Осередка Православной Культуры Ельпіс в Ґорлицях. Вчас конференциі выступлят прелеґенты з Польщы і заграниці. Симпозия зачне ся о 10.00 год. Вступне дармо. Головным орґанізатором є Осередок Православной Культуры Ельпіс в Ґорлицях. Як сме перше інформували, симпозия під тым самым наголовком одбуде ся тіж ден перше, 28. жолтня/октобра в Конференцийній Сали Президентского Готелю в Ряшові. На афішы, якій інформує о подіях, поміщено знимкы повязаны з одроджыньом православя на Лемковині в 20. і 30. роках ХХ ст.

«ЛемАРТ Ґладышів’24»

В неділю 27. жолтня/октобра шолтыс Ґладышова разом з Інститутом Красных Штук Ряшівского Університету просят на вернісаж выставы пн. «ЛемАРТ Ґладышів’24», т.є. черговый показ прац артистів з Польщы, Бельґіі, Украіны, Німец, Франциі і Зєднаных Штатів Америкы, в рамках медженародного артистично-наукового проєкту «Łemkowszczyzna – Лемковина». Вернісаж одбуде ся о 16.00 год. в Ґалериі Білянка 73. Выставу мож буде обзерати до 8. листопада/новембра тр.

XVII Стрічы Трьох Поколінь з Лемківском Культуром

Припоминаме, што уж в найблизшый вікенд 26.-27. жолтня/октобра на Нижнім Шлеску одбудут ся XVII Стрічы Трьох Поколінь з Лемківском Культуром. Орґанізатором єст Стоваришыня Лемків. В рамках подіі одбудут ся два концерты, першый в суботу о 16.00 год. в Пшемківскым Осередку Культуры і другій в неділю о 16.00 год. в Авли Комплексу Шкіл в Польковицях. В концертах выступит Лемківскій Ансамбль Пісні і Танця «Ластівочка» разом з запрошеныма гістми.

Творчы варштаты в Рускій Бурсі в Ґорлицях

А уж заран в просторах Руской Бурсы в Ґорлицях одбудут ся дальшы варштаты в рамках Творчой Бібліотекы – циклю стріч для діти і молодежы, вчас котрых рыхтуваны сут розмаіты ручной роботы артефакты. Тым разом будеме робити вінці з сушеного квітя. Подія зачне ся о 11.00 год. Варштаты буде вела Олена Дуць. Подія є орґанізувана завдякы дотациі Міністра Внутрішніх Справ і Адміністрациі. Красні просиме вшыткых – і старшых, і молодшых. Вступне на варштаты дармо.