Сумар дня на 25. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 25. жолтня/октобра 2022 р.

Члены Округлого Стола Русинів Словациі зобрали ся на засіданю

21. жолтня/октобра в просторах Словацкого Нацийонального Музею – Музею Русиньской Культуры в Пряшові одбыло ся 34. засіданя Округлого Стола Русинів Словациі. В часі стрічы члены припомнули 10. річницю основаня той плятформы. Медже важныма пунктами засіданя было м.ін. підсумуваня трьох років, в часі якых ведучым ОСРС был Петро Штефаняк. Окрему увагу достала оціна кампаніі веденой в часі повселюдного списуваня, завдякы котрій чысло Русинів ся збільшыло, а русиньска меншына має дальше статус третьой найбільшой на Словациі. На засіданю выберали і нову президию. Наступны три рокы ведучым зас буде Петро Штефаняк, а в заряді орґанізациі засіли м.ін. Петро Медвідь ци Мілян Ян Піліп. Члены представили тіж пляны і задачы на будуче, бесідували і тему діянь, котры дадут можливіст вступу ОСРС до єдной з вызначных европейскых меншыновых орґанізаций, што дозволило бы пошырити можливости охороны і промуваня русиньской культуры.

В Бєщадах ремонтуют єдну з найстаршых церкви

Зачали ся ремонтовы працы при церкви св. Миколая в Поляні (бєщадскій повіт). О потребі ремонту найправдоподібнійше найстаршого сакрального обєкту на обшыри Бєщадів писали сме початком того рока. Товды вказали ся внескы з проведеного технічного досліджыня, котры потвердили, што стан церкви ся погіршат, особливо зовнішня част храму. Головны того причыны то знищеный дах та осіданя фундаментів од пілнічной страны. Тото зас спричынят нищыня захованой в середині церкви поліхроміі з початку XX ст. Парохіі, де находит ся церков, не было стати на так великій выдаток, якым єст ремонт так віковой святыні. З помочом пришла Підкарпатска Фундация Охороны Забытків «ОПОКА. Завдякы фундациі в поляньскій церкви зачал ся першый з етапів ремонтовых прац, в рамках якого проведеный буде ремонт і консервация даху. Як підкрисляют орґанізаторы модернізациі храму, не єст то конец і надіют ся, што неодолга святыня зас буде тішыла свойом красом вірных і туристів.

Остатня хвиля, жебы записати ся на забаву аж до рана в Вапенным

Кєд дахто не має іщы плянів на тогорічне пущаня, маме для вас добру новину. Дві молоды Лемкыні, Аня Горбаль і Ольга Шевчык, просят на Пущаня до Вапенного. Забава пройде в сали при Здрою 12. листопада/новембра, старт о 19.00 год., а пригрывал буде ансамбль Вороны. Вступне то 165 зл, в тым єст ідло, закускы, напиткы і дашто солодкє. Резервувати місця мож через ґамбокнижку або безпосередньо в орґанізаторок. Вшыткы потрібны даны до контакту находят ся на фейсбуковій страні подіі. Охочы можут ся зголошувати до кінця жолтня/октобра, але треба ся спішыти, бо чысло місц єст ограничене.

«Бескідскы Дзяды»

На конец припоминаме, што в найблизшый вікенд в Высовій 30. і 31. жолтня/октобра і 2. листопада/новембра о 18.00 год. мож буде видіти пєсу пн. «Бескідскы Дзяды» зрыхтувану Театральном Ґрупом Племя з Устя Руского. Пєса єст пробом вказаня істориі о вмерлых звязаных з реґіоном Низкого Бескіду і єдночасно великом афірмацийом жытя.

фот. Szlak Architektury Drewnianej Podkarpacia