Сумар дня на 25. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 25. вересня/септембра 2024 р.

Уж заран будут розправляти о стані русиністикы

В найблизшый четвер 26. вересня/септембра в Пряшові одбуде ся Медженародна Наукова Конференция пн. «Камо грядеши? Динамічны процесы в сучасній карпаторусиністиці». Цілю конференцию є комплексова анализа сучасного стану карпаторусиністикы на Словациі за послідніх 10 років, значыт од часу IV Конґресу Русиньского Языка. Орґанізатором конференциі є Інститут Русиньского Языка і Культуры Пряшівского Університету. Проґрам конференциі поділеный є на три пленарны засіданя, серед прелеґентів находят ся академікы, м.ін. проф. Павел Роберт Маґочій, др Анна Плішкова ци др Люба Кральова, а тіж практикы языка. Наш редакцийный колеґа Петро Медвід буде мал доповід в рамках другого засіданя, што тыкат актуальных проблемів сучасной русиньской лінґвістикы і літературознавства на Словациі – буде бесідувал про проблемы перекладів на русиньскій язык. Зас Демко Трохановскій, автор языковых радийовых проґрамів, вчас тертього засіданя, буде бесідувал о полівариянтивности кодифікуваных і некодифікуваных языковых норм в публикациях радия Руской Бурсы ЛЕМ.фм: норма ци реальна необхідніст. По конференциі пройде презентация новых выдань Інституту.

Утрудніня медже Яслом а Бічом

Зачынат ся ремонт желізницьовой лениі но 108 Сторожы-Коростенко медже Яслом а Бічом. В звязку з роботами на трасі Сторожы-Ясло были введены зміны в орґанізациі руху потягів. До 8. листопада/новембра специяльна машына до выміны верхньой желізнивьоцой верствы здемонтує стары штрекы, а в іх місце уложыт новы елементы. Выремонтуваных буде тіж 10 переправ і мостів. Ремонты поправлят технічный стан одтинка, звекшат прохідніст і безпеку переіздів. Кошт інвестициі то 20 млн зл. З причыны того ремонту до 8. листопада/новембра введена была автобусова заступча комунікация медже Бічом а Яслом. Єст то черговый етап робіт при лениі 108. Скорше роботы проходили на приграничным фраґменті.

За попартовый рисунок можна достати чытнік KINDLE

Припоминаме, што іщы до кінця того місяця тырват плястичный конкурс для діти пн. «Eнді Варголь в моім селі» орґанізуваный Стоваришыньом «Руска Бурса» в Ґорлицях. До выграня сут цінны нагороды. Іде о зробліня (свобідном техніком) плястичных робіт, котры будут інспіруваны творчістю Енді Варголя. Малюнкы можут представляти сценкы зо штоденного жытя мешканців села, іх роботу, звыкы, ілюструвати архітектуру села ци краєвиды, представляти жытелів сел – портреты. Задачом є зробити іх в такій спосіб, як творил Варголь – попартово. Роботы будут оцінюваны в трьох віковых катеґориях: до 8 років, од 9 до 11 років і од 12 до 14 років. До выграня сут чытникы KINDLE і інчы цінны нагороды. Роботы (велькости А4) треба прислати до 30. вересня/септембра тр. на адрес Руской Бурсы в Ґорлицях. Дрібниці та мотузкы до реґуляміну і згоды на участ дітины в конкурсі найдете в дописі на нашым портали. Роботы будут пак презентуваны в будинку Руской Бурсы в Ґорлицях – вчас вернісажу пройде оголошыня лавреатів і вручыня нагорід. Красні заохочаме взяти участ в конкурсі!

Дармова дорога через автостраду А4

Компанія Stalexport ввела дармовы переізды платным одтинком Автострады А4 Краків-Катовиці для урядовых і позаурядовых орґанізаций, котры несут поміч потерпілым в потопах. Перед плянуваным переіздом том дорогом треба зголосити поізд через специяльный формуляр. Зголошыня мусит вплынути мінімум добу перед выіздом. Формуляр доступный є на сайті фірмы Stalexport. Звільніня з оплат потырват до кінця жолтня/октобра. Што важне – звільніня не тыкат приватных осіб, лем спомнены урядовы і позаурядовы орґанізациі. Колекты для потерпілых тырвают в цілій Польщы. До вызначеных пунктів фурт мож приносити воду до питя, ідло, середкы до прятаня, гіґієны ци карму для звірят.