Сумар дня на 25. січня/януара 2022 р.

Приносиме вам сумар медияльной ґрупы ЛЕМ.фм+ на ден 25. січня/януара 2022 р.

Ци Евросоюз вкінци займе ся ініциятивом Minority SafePack?

Европейскій Трибунал Справедливости розсудил, што ініциятива Minority SafePack входит в обшыр компетенций Европейской Уніі. Вырок был выданый в справі заскаржыня ініциятивы Румунійом. То важне рішыня, кєд же навысшый европейскій суд потвердил єднозначно, што власти Европейской Уніі мусят заняти ся зголошеном ініциятивом, бо єдном з задач Евросоюзу єст м.ін. охорона нацийональных і етнічных меншын. Minority SafePack то ініциятива, котра має ґарантувати вшыткым языковым і нацийональным меншынам в Европі высокы стандарды хороніня іх прав, достоменности, підтримуваня культуры і вшелеякых аспектів штоденного жытя – так членів приналежачых до меншын, як і орґанізаций, котры в меншыновым просторі діют і еґзистуют. В рамках Европейской Соспільной Ініциятивы громадяне мают право зголошувати своі пропозициі правных реґуляций. Думкодавці ініциятивы Minority SafePack іщы в квітни/апріли 2018 р. зобрали 1,1 мілийона підписів. Од тамтой поры Евросоюз не хотіл ся ньом заняти. По выроку суду – буде мусіл.

Комасация в Санковій

В Санковій пройде послідній етап комасациі ґрунтів. Ґорлицкій Староста Мария Ґубала скликує на ден 3. лютого/фебруара тр. зобраня участників комасациі ґрунтів села Санкова. Задачом стрічы буде ввести участників комасациі в посіданя выділеных ґрунтів на основі рішыня Старосты з дня 6. вересня/септембра 2021 рока. Од даты плянуваного зобраня рахує ся дату обнятя маітельскыма правами нововыділены ґрунты. Термін тот обовязує так само пристуных на стрічы участників комасациі, як і тых неприсутных.

Екопарк і Екогероі в Радоцині

13. січня/януара тр. в Радоцині прошла стріча, головном темом котрой были інвестицийны пляны звязаны з дальшом будовом Екопарку Радоцина. На стрічы, якой орґанізатором был Надлісничый Надлісництва Ґорлиці Юзеф Леґутко, присутны были м.ін. локальны власти і представникы інчых Надлісництв. В першій части Юзеф Леґутко омовил темы звязаны з роботом лісовых робітників і зрівноваженом лісовом господарком, на котрій, подля його слів, основане єст фунґуваня Державных Лісів. Представил так само інвестицийны роботы звязаны з розбудовом Екопарку Радоцина (едукацийны стежкы, рекреацийно-выпочынкова част, конференцийна саля). В другій части стрічы лавреаты загальнопольского еколоґічного конкурсу Екогероі, школярі І Загальноосвітного Ліцею ім. Марціна Кромера в Ґорлицях, представили свій успішный екопроєкт пн. «Ід за слідом». Підсумуваньом стрічы были короткы выповіди запрошеных гостів тыкаючы дальшой спілпрацы в обшыри еколоґічной едукациі в Екопарку.

Мешканя для выхованків дому дітины на старт в доросле жытя

В Польковицях робітникы KGHM выремонтували мешканя для выхованків дому дітины на старт в доросле жытя. Од мідьовой компаніі молоды люде отримали тіж подаркы на нове мешканя. Роботы тырвали штырі місяці. Разом в ремонті взяло участ дестят волонтерів, м.ін. копальникы і ратівникы. 80-метрове мешканя, по ґенеральным ремонті, є першым такым місцьом в польковицкым повіті, де молоды люде можут жыти аж до часу, коли будут вполни самодільны. Свою цеголку доложыл тіж заряд KGHM. Презес KGHM Мариян Хлюдзіньскій, підсумувуючы акцию, повіл, што особливо цінит безпосереднє заанґажуваня працівників компаніі в волонтерство, додал тіж, што зробили дуже доброй роботы.