Сумар дня на 25. мая 2023 р.

Приносиме вам сумар медияльной ґрупы ЛЕМ.фм+ на ден 25. мая 2023 р.

В Давидові одкрыли Ізбу Памяти Василя Гопка

21. мая 2023 р. проходил в грекокатолицкій парохіі в селі Давидів на Пряшівщыні одпуст з нагоды праздника Вознесіня Господа, на котрый запрошыня принял владыка Петро Руснак, аспостольскій адміністратор пряшівской архієпархіі і братиславскій єпарха. Вчас одпусту одбыло ся посвячыня будинку бывшой плебаніі, в котрій одкрыто Памятну Ізбу Василя Гопка, блаженного священномученика, якій был помічным єпископом товдышньой грекокатолицкой пряшівской єпархіі. Будинок, в котрым тепер находит ся памятна ізба, был наперед грекокатолицком народном школом, а пізнійше служыл як парохіяльный уряд. Обєкт был свідком великых моментів церкви, насильного одведжыня священника Юрия Буйняка державныма властями в 1951 р., коли уж церков была ліквідувана, але і його навернутя по одновліню Грекокатолицкой Церкви в товдышній Чехословациі в 1968 р. Як раз за часів коли парохом был о. Буйняк, Давидів часто одвиджал священномученик Василь. В памятній ізбі, в котрій часто перебывал, находят ся ориґінальны артефакты з його жытя.

Монастырскій музей богатшый о лемківскы кроі

Як інформує Музей в Монастырисках (Украіна), до його колекциі были переданы дальшы елементы традицийного лемківского крою. Передал іх Вільям (Василь) Джула, бывшый голивудскій проєктант кроів і колекцийонер давного лемківского облечыня. Джула за походжыньом є Лемком. Не был то першый раз, коли передал він до монастыриского музею елементы лемківского облечыня. Попереднім разом было то в січни/януарі 2022 р. Тым разом музейна колекция збільшыла ся о кривулькы, запаскы, кошелі, пацюркы ци жіночы ґорсеты. Дарунок, якій пришол з Америкы од Вільяма Джулі, был оплаченый при помочы Владка Максимовича.

Ден Дітины в Устю Рускым

Ґмінный Осередок Культуры в Устю Рускым просит в найблизшу неділю, 28. мая 2023 р. до спільного святкуваня Дня Дітины. Ґмінны святкуваня одбудут ся на устяньскым спортовым пляци. Початок подіі заплянуваный єст на 15.00 год. В проґрамі м.ін. атракциі для наймолодшых, в тым показы карате, конкурсы, выступы танцювальных ґруп та дальшы несподіванкы. О 17.00 год. зачне ся концерт пн. «Витайте в нашій байці». Товаришучом подійом будут змаганя в іманю рыб над климківскым озером. Заохочаме до участи вшыткы діти і іх опікунів.

Пятницьова премєра в ТАД

Уж заран, 26. мая в Театрі Александра Духновича в Пряшові одбуде ся премєра пєсы пн. «Вісем жен». Представлят она детективну історию і мозаіку людскых характерів в ґротесковых ситуациях. Режысером єст Михал Бабяк, а переклад на наш русиньскій язык зробил Валерий Купка. Михал Бабяк, того часу доцент на Катедрі естетикы Філософічного Факультету Університету Коменьского в Братиславі, походит з сербской Войводины. Його словацкы предкы там мали близко 300-річну історию. По тым як зачала ся война, початком 90. років переселил ся з родином на Словацию. В Театрі Духновича робит першый раз, но на своім конті режысера має 130 драматичных і коло десят оперных представлінь. Як подал, русиньскый язык, в котрым ся буде «Вісем жен» грало, є за порядком шестым языком, в котрым дотепер реализувал свою режысерску роботу. Пєса была написана Робертом Томасом в 1961 р.