Сумар дня на 25. мая 2021 р.

Приносиме вам сумар медияльной ґрупы ЛЕМ.фм+ на ден 25. мая 2021 р.

На Маластівскій Маґурі зас буде можна обзерати Гірскы Змаганя

В першый вікенд червця/юнія уж семый раз на Маластівскій Маґурі пройдут Гірскы Змаганя. Орґанізатором подіі єст Автомобільклюб Бічскій. Змаганя зачнут ся в пятницю, 4. червця/юнія, і уж товды мож буде пообзерати участників на ґорлицкым рынку, де будут одбераны і пройде технічно-контрольне тестуваня стартуючых авт. В дальшых двох днях пройдут два етапы змагань, першый в суботу, 5. червця/юнія, а другій в неділю, 6. Траса змагань то понад 3,5 км і іде она дорогом но. 977. Участникы стартувати будут в Маластові, а кінчыти в Ґладышові. Як повіл представник Гірскых Змагань на Маластівскій Маґурі, зо взгляду на характеристичну і цікаву трасу акция тішыт ся великом популярністю. Єст то тіж добра нагода, жебы промувати реґіон. Патронат над тогорічныма змаганями тримат Маршалок Малопольского Воєвідства Вітольд Козловскій, конкурсови патронуют тіж самоурядовці Ґорлицкого Повіту, старостка Мария Ґубала, бургомайстер Ґорлиц Рафал Кукля і війт ґміны Санкова Малґожата Малух і Ґміны Санкова, Устя Рускє, Ропа, Ґорлиці, Біч і Лужна.

Заатакувано протестуючых

Вночы з пятниці на суботу заатакувано протестуючых в справі вытинкы дерев на обшыри Перемышльского Погіря. Як сме інформували, од парох тыжнів активісты з Ініциятивы Дикы Карпаты ведут блокаду, котрой цілю єст не лем стримати вытинку цінных лісовых обшыри, але тіж звернути увагу на девастацию проєктуваного і плянуваного од років Турніцкого Нацийонального Парку. Як мож чытати на офіцийным фейсбуковым сайті орґанізациі, вночы з 21. на 22. мая під блокаду підіхало авто з пятьома пасажерами, з котрого высіл замаскуваный мужчына з бейсбольовым кыйом і заатакувал штрырі протестуючы жены. Справа одраз была зголошена на поліцию і, як подала представничка коменды в Перемышли, поліция зачала ю досліджати. Завдякы тому, же заатакуваны запамятали реґістрацийны таблиці, повело ся ся зімати двох підозреных.

Церкви в Перегримці і в Святковій Малій ждут на реновацию

Понад 3,5 тис. зл отримают єдиниці самоуряду з обшыри ясельского повіту на утриманя і реставрацию аж 12 забытковых сакральных обєктів. Середкы з пулі Підкарпатского Воєвідского Консерватора Забытків дозволят зачати новы задачы або скінчыти заплянуваны реновациі. Серед дофінансуваных забытків нашли ся тіж церкви з Лемковины, храмы в Перегримці і Святковій Малій. В Перегримці за отримане дофінансуваня буде проведена консервация олтаря, а в Святковій Малій внесок о дофінансуваня складано з думком провести загальны консерваторско-реставраторскы роботы, м.ін. при хоругвах, престолі та іконі Розпятя.

На Креницкій Яворині вознесут видокову вежу

На конец добра новина для вшыткых любителів краєвидів Крениці і не лем. На Креницкій Яворині тырват будова видоковой вежы. Буде то найвысшый видоковый пункт в околици. Вежа стане при ґондольовій леніі і буде высока на більше як 100 м. Одвиджаючы будут мочы захоплювати ся краєвидом з новой атракциі іщы того літа.

фот. www.wyscigmagura.pl