Сумар дня на 25. марця 2025 р.

Приносиме вам сумар медияльной ґрупы ЛЕМ.фм+ на ден 25. марця 2025 р.

Новый проєкт трансграничной спілпрацы ґмін находячых ся в Звязку Ґмін Доріча Вислокы і Пряшівского Самосправного Краю

В Ясєльскым Домі Культуры 20. марця прошла конференция в рамках одкрытя проєкту «Трансгранична спілпраца ґмін находячых ся в Звязку Ґмін Доріча Вислокы і Пряшівского Самосправного Краю для збільшыня одпорности на природны катастрофы звязаны зо змінами климату, в тым через зміцніня спілпрацы ратівничых служб в обшыри кризисового заряджаня». Проєкт реализуваный єст в рамках проґраму Interreg Polska-Slovacja 2021-2027. В подіі участ взяли представникы уряду, самоурядів, державной пожарничой і охотничой стражы та партнеры і коодринаторы проєкту. В часі стрічы присутны бесідували о задачах звязаных з лагоджыньом консеквенций змін климату і підкрисляли значыня трансграничной спілпрацы в тій обшыри.

Буджет ґміны Устя Рускє то в тым році понад 70 млн злотых

Ґміна Устя Рускє плянує заінвестувати з него предовшыткым в водно-канализацийну господарку. Найвекшы з плянуваных інвестиций то очыщальні, кошт із будовы залежно од велькости то од 2 до 10 млн злотых. Іде м.ін. о розбудову очыщальні в самым Устю Рускым ци ремонт очыщальні в Ганчовій. Ґміна має тіж зачати будову канализациі долины Білой од Брунар до Ізб. То великій проєкт, на котрый – подля війт Евы Ґарбовской-Ґуры – треба буде плянувати вельолітнє позыскуваня зовнішніх дотаций.

Остатня нагода зложыти внесок в проґрамі Міністерства Внутрішніх Справ і Адміністрациі

Днес остатній ден складаня оферт на реализацию задач звязаных з охороном культуровой достоменности меншын. Міністерство Внутрішніх Справ і Адміністрациі початком марця оголосило додатковый набір оферт на реализацию в 2025 році задач звязаных з охороном, захованьом ци розвитком культуровой достоменности етнічных і нацийональных меншын або з захованьом і розвитком реґіонального языка. Оферты мож складати днес до пілночы. Што важне, термін реализациі задач не може ся зачынати скорше як 4. марця. Листа признаных дотаций буде опубликувана найпізнійше 20. червця/юнія.

Чергова Карпатска Стріча про гірництво в польскых Карпатах

В найблизшым часі пройде чергова онляйнова Карпатска Стріча. В четвер, 27. марця, о 19.00 год. др Януш Будзішевскій оповіст о давным гірництві в польскых Карпатах, а докладні в таємичій горі Ярмута в Малых Пєнінах. Іщы недавно мало досліджынь односило ся до істориі гірництва в Карпатах, хоцкі знатя было о джерелах соли, ропы і руд. Розвиток технолоґіі дає можливости лясерового скануваня, што дозволило на інвентаризацию гірничой діяльности в Карпатах. Найстаршы сліды выдобываня руд в тым реґіоні вяжут ся з епохом бронзу. Як все, трансмісию мож буде обзерати на каналі YouTube Карпатского Товариства, а кєд дахто хоче взяти активну участ в дискусиі, єст тіж можливіст участи через плятформу ZOOM, при чым скорше треба ся зголосити до орґанізаторів.

3. Лемківскє Співаня в Высокым

Ґмінный Центр Культуры Ґміны Рудна уж тепер просит на 3. Лемківскє Співаня. Подія пройде в суботу 24. мая в Высокым. Стріча зачне ся о 13.00 год., а першом атракцийом буде перехід в хороводі ансамблів. На сцені запрезентуют ся ЛАПіТ «Кычера», Ластівочка, Розтока, Поляне, Сасанка, Н’Лем Фольк, Дамир, Надія і Лемкус. Орґанізаторы задбали і о додатковы атракциі, выставы, буде презентация народной творчости і варштаты. Не бракне забав для наймолодшых. Патронами подіі сут KGHM to my і ініцятива Gmina Rudna łączy ludzi.