Сумар дня на 25. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 25. листопада/новембра 2021 р.

Досліджайте архів Апостольской Адміністрациі Лемковины

Неоціненой вартости документация – архів Апостольской Адміністрациі Лемковины (ААЛ), є одтепер доступна од рукы в нашых хыжах. Од парох місяців Державный Архів в Перемышли публикує здіґітализуваны документы з періоду меджевойня і часів окупациі, якы дотуляют діяльности грекокатолицкой церковной структуры на Лемковині. Долгы рокы люде, якы не занимали ся наштоден досліджаньом істориі ААЛ, не знали ани о тым, же значучу част архіву удало ся сохранити і нашла ся она під опіком польской архівной інституциі. Переглядаючы сохранены документы, мож переслідити штоденну діяльніст ААЛ, а і проблемы, з якыма приходило ся ій стрічати як церковній структурі. Завядкы анализі архіву можеме познати хоц бы одношыня ААЛ до світскых лемківскых структур. Заховала ся кореспонденция м.ін. з Лемківскым Комітетом в Саноку. Велика част архіву то выходяча і приходяча офіцияльна кореспонденция.

Стріча Русинів з полномічным Буковскым

В віторок, 23. листопада/новембра, полномічный влады Словацкой Республикы Ласло Буковскій зорґанізувал робочу стрічу з представниками русиньской меншыны, котрой темом был нацийональный закон. Закон о меншынах, котрого версия має ся достати в тых днях до фінальной подобы, жадали приняти іщы попередню владу представникы меншын. Буковскій представил на веденій в гыбридовій формі стрічы текст закону і консультувал го. В тых днях такы стрічы одбыл і з другыма нацийональныма меншынами. За Русинів присутны были Петро Медвідь і Мілян Ян Піліп, а і іх заступникы Мартін Караш та Петро Штефаняк. Участ брал і русиньскій активіста Йосиф Бадида. Робоча стріча была конструктивном дискусийом, в рамках котрой представникы Русинів з полномічным пояснили тоты части закону, котры не были цілком зрозумілы. Закон міг бы ся достати до парляменту іщы перед літніма парляментарныма вакациями.

Ремонт ґорлицкого спортового пляцу

Уж неодолга спортовці і аматоры фізичной активности будут мочи хоснувати модерный і добрі зрыхтуваный одкрытый спортовый обєкт в Ґорлицях. Як раз зачала ся перебудова так званой Сагары – боіска на обшыри ґорлицкого Осередка Спорту і Рекреациі. Окрем самого ареалу, выбудуют будинкы і товаришучу інфраструктуру. Боіско буде мало выміры 95×64 м. Теперішні роботы обнимают демонтаж істнуючого огороджыня і освітліня та розобраня тротуарів. Боіско буде мало нову верхню траву. Побудувана буде і нова канализация та замонтуване нове освітліня. Будут доданы лавкы і кабіны для граючых. Перебудова ґорлицкого обєкту є фінансувана з Урядового Проґраму Фонд Локальных Інвестиций – гірскы ґміны 2021.

Ремонт дорогы медже Камюнком а Гнієздным

Меджe селами Камюнка і Гнієздне в старолюбовняньскым окресі на Словациі оддали в минулый четвер до хоснуваня дальшу оновлену дорогу. Трасу долгу на 3,7 км обновлювали в рамках третього етапу проєкту Модернізация Дорогового Споіня Пєніньскых Нацийональных Парків, котрый был фінансуваный посередництвом проґраму Interreg. Тот етап коштувал понад 1,1 млн евро, з тым же 85% коштів было фінансуваных з дотациі, котру не треба вертати. 10% платила держава і 5% Пряшівскій Самосправный Край. Од 2019 р. в направу доріг на пілночы Спиша заінвестували уж приблизно 5,5 млн евро.