Сумар дня на 25. липця/юлия 2022 р.

Приносиме вам сумар медияльной ґрупы ЛЕМ.фм+ на ден 25. липця/юлия 2022 р.

Нова біциґльова траса на західній Лемковині

Мож уж хоснувати біциґльову трасу, котра веде долином Попраду – зачынат ся в Креници, а кінчыт в Старым Санчы. Траса має 60 км і веде так по стежках з асфальту, оддіеных од руху, як і по пасі загального руху. Возникнула в рамках проєкту Velo Małopolska і при спілпрацы ґмін Крениця, Пивнична, Мушына, Рытро, Старый Санч і з партнерами по словацкій страні. Трасу мож легко переіхати протягом єдного дня, єст легка, а краєвиды захоплючы. По дорозі, в Мушыні мож заіхати до єдного з джерел мінеральной воды. Ведут до них специяльны біциґльовы пути, як Aquavelo ци Пут Мінеральной Воды. Velo Małopolska то векшый проєкт реализуваный малопольскым воєвідством з середків Евросоюзу – доцільово буде чыслил 1000 км роверовых трас. Складат ся з осмох части, м.ін. Velo Dunajec, Velo Raba, Velo Rudawa ци Velo Poprad. Лучыт найважнійшы міста реґіону, а тіж Малопольщу з інчыма воєвідствами.

Явило ся дальше уж выданя публикациі «Польско-рускій Бескід. Леґенды і оповіданя»

Книжка авторства Анджея Потоцкого выдана в 2017 році то 178 леґенд і оповідань, котры были зобраны автором вчас чысленных прогульок по Низкым Бескіді. В своіх опрацуванях Анджей Потоцкій односит ся до необычной істориі реґіону, якій през вікы был отчызном Лемків, Погірян, Долинян, Замішанців, Поляків і Циґанів. 5 леґенд переведено на лемківскій язык – тлумачыня зрыхтували Моніка Тылявска і Варавара Дуць. В оповіданях і леґендах находиме барвный, вельокультуровый Бескід з цілом його природничом красом. Познаєме місточка, села і селечка, як тіж жытя і традициі його мешканців.

Іщы того рока закінчат ся будовляны працы при резервуарі в Крампній

Будова резервуарі в Крампній рушыла в минулым році на яр, але з причыны комплікаций звязаных з выконавцьом новой інвестициі ся опізнят. Власти ґміны уж од 2018 р. старали ся заґаздувати резервуар на ріці Вислока. В проєкті рекреацийно-спортового обєкту находит ся будова двох басенів, санітарно-технічного будинку, пляц забав, силовня під одкрытым небом і ремонт будинку бывшой ремізы. Додатково в рамках інвестициі має быти зроблене освітліня тротуарів, алейок і паркінґів. Як передал війт ґміны Крампна, інвестиция єст уж готова в 70%, а згідні з проєктом працы повинны ся закінчыти 15. вересня/септембра тр. На жаль в часі тырваня будовляных робіт кошты інвестициі збільшыли ся і актуально выносят понад 2,5 млн зл.

«BeskidVibe Fest» в Устю Рускым уж в тым тыжни

В остатній вікенд липця/юлия в Устю Рускым одбуде ся першый музичный фестіваль. «BeskidVibe Fest» то ґрупа молодых люди з обшыри ґміны, котра рішыла зорґанізувати штоси, чого іщы в ґміні не было. Цілю акциі єст зінтеґрувати соспільство незалежно од віку ци музичного смаку. На фестівали почути буде мож рок, фольк, рап і блюз. На сцені запрезентує ся тіж ансамбль Руты Увиты і знана уж в Низкым Бескіді Театральна Ґрупа Племя. В часі фестівалю будут ся тіж презентувати локальны ремісникы і артисты. Орґанізаторы мают в плянах і «спільне музикуваня», зато просят приходити зо своіма інструментами. Подія пройде в двох локализациях в Устю – буде лісова сцена, што навязує до натуры, і сцена на стадийоні. Зато же єст то незалежна ініциятива орґанізаторы просят фінансово підтримати першу едицию подіі. Мотузок до колекты найдете на фейсбуковым сайті фестівалю, а гармоноґрам подіі находит ся на інтернетовій страні фестівалю.