Сумар дня на 24. січня/януара 2025 р.

Приносиме вам сумар медияльной ґрупы ЛЕМ.фм+ на ден 24. січня/януара 2025 р.

Зимовы вакациі з Бєщадскым і Маґурскым Парком

Для части ученників тырвают зимовы вакациі. З той нагоды Осередок Еколоґічной Едукациі та Музей Природы Бєщадского Нацийонального Парку просят на варштаты «Природничо-артистичны четвергы для діти». В каждый четвер в годинах 10.00-12.00 діти, як і родичы, або зорґанізуваны ґрупы будут мочы взяти участ в занятях і варштатах. Орґанізаторы задбали о шыроку област тем . Кажда стріча складат ся з прелекцийной части, де участникы будут мочы послухати і дознати ся більше о драпіжниках з БНП, звізды, еколоґію ци охорону природы. Друга част то артистичны занятя. Варштаты сут орґанізуваны в Музею Природы БНП а полный гармонограм занять находит ся на офіцияльным сайті парку. На варштаты обовязуют скоршы записы а вступ платный єст 30 зл. Атракциі для наймолодшых з нагоды зимовых вакаций зрыхтувал тіж Маґурскій Нацийональный Парк. Подібні як в підкарпатскым воєвідстві, в каждый четвер Маґурскій Парк орґанізує тереновы прогулькы по парку. Вступ дармо, а інформациі што до локалізациі прогулькы сут заміщаны на фейсбуковым сайті МНП.

Ци на Лемковині одкрыют наступны резерваты природы?

Початком рока Віцеміністер Климату і Середовиска заповіл, што простір лісных резерватів звекшыт ся двократно. Рівночасно представил мапу з пропозицийом, де можут ся найти новы обшырі охороны, або котры резерваты будут побільшены. Як підкрислил, Державны Лісы затримают вытинку в місцях означеных на мапі. Листа обнимат понад 1200 лісных екосистемів вызначеных через природників і лісничых. Вісем з запропонуваных локалізаций находит ся в ґорлицкым повіті. Припоминаме, што кінцьом 2024 рока Реґіональный Директор Охороны Середовиска в Кракові рішыла одкрыти в ґорлицкым повіті 3 новы резерваты: «Козє Ребро», «Марковєц-Ґрудек» і «Яворина на Холмі». Згідні з предтсвленом мапом наступных резерватів, мож ся сподівати в околици Масляной Горы, Сухого Верха, при Маластівскій Маґурі, або обшыри Радоцины і Волівця. Вшытко же залежыт од проведеной верифікациі, ци даный простір повинен быти обнятый резерватом.

Свидник і Санок разом ш проєкті «інтерактивне е-погранича»

В середу, 22. січня/януара, прошла конференция на одкрытя реализациі малого проєкту міста Свидник з містом Санок пн. «інтерактивне е-погранича». Цілю проєкту єст одкрыти спільну туристичну оферту в інтерактивным вымірі, м.ін. через ефективне передаваня інформаций ци презентацию туристичной оферты на пограничы. Орґанізатором подіі было місто Свидник, а вчас стрічы присутны дискутивали над наступныма проєктами і можливостю розвитку туристикы. Єдна з задач проґраму то одкрытя через місто Свидник інтерактивного панелю, де найдут ся актуальны інформациі для туристів.

Автобус з Ґорлиц до Смереківця буде курсувал через цілый 2025 рік

В попереднім тыжни Ґорлицкій Повіт підписал умову з Малопольскым Воєводом о дофінансуваня на продолжыня автобусовой леніі Ґорлиці-Санкова-Смерековец- Ґорлиці. Завдякы фінансовій підпорі жытелі повіту будут мочы хоснувати автобусове получыня через цілый 2025 рік. Як підкрислил староста Ґорлиц, Мірослав Валонґ, підтриманя той леніі єст барз важне для жытелів сел, котры часом лем в такій спосіб можут ся достати до Ґорлиц, де працуют або ся вчат. Дофінансуваня походит з Фонду Розвитку Автобусовых Перевозів, котрого цілю єст протидіяти комунікацийому выключыню.