Сумар дня на 24. мая 2024 р.

Приносиме вам сумар медияльной ґрупы ЛЕМ.фм+ на ден 24. мая 2024 р.

Науковый выклад в Рускій Бурсі – о Акциі «Вісла» і постанові ІНП

Припоминаме, што уж днес в Рускій Бурсі в Ґорлицях мож выслухати выклад пн. «Постанова о ремісиі слідства в справі акциі ”Вісла” – чом не мож згодити ся з єй змістом?», котрый выголосит др габ. Ян Пісуліньскій, професор Ряшівского Універистету, автор моноґрафіі «Акция специяльна ”Вісла”». Припомнийме, што піл рока тому Інститут Нацийональной Памяти ствердил, што, парафразуючы – не было ничым злым, же Лемкы і Украінці досвідчыли акциі «Вісла». Не было і неє згоды на такы стверджыня. Неє згоды на фальшуваня істориі. Як заповіл проф. Пісуліньскій, його «выступліня буде полеміком з фальшывым змістом поданым в постанові прокураторкы одділіня Комісиі Гоніня Злочынів проти Польскому Народови в Ряшові з 24. листопада 2023 р., што тыкат ґенезы, дій та наслідств акциі ”Вісла”». За професором «В постанові є шор неточности, маніпуляциі і пілперечности в арґументациі». Доповід буде выголошена в польскым языку. Початок о 18.00 год.

Уродины Никыфора – Артисты з Крениці для Никыфора

Центр Культуры в Креници вєдно з Братством Грекокатолицкой Молодежы ”Сарепта” з нагоды уродин Никыфора просят на выняткову стрічу припоминаючу лемківского маляря – представника примітивізму. 5. річницю діяльности буде святкувала тіж Ґалерия Сучасных Ікон, в котрій одбудут ся ”Уродины Никыфора – Артисты з Крениці для Никыфора”. Подія пройде в суботу 25. мая. Початок о 15.00 год. Вступне дармо.

Середовискове рішыня бльокує інвестицию в ґміні Мушына

На початку тыжня інформували сме, што ґміна Мушына хоче одкрыти лыжный вытяг в Щавнику іщы в тым році. Не вшытко єднак іде згідні з пляном в другій части курорту. Ендемічна трава фурт опізнят будову ґондолі на гору Мальник. Іде о обшыр велькости 0,14 га, на котрым має станути єдна підпора гірской желізниці, а на котрый ґміна мусит зрыхтувати специяльный рапорт діяня на середовиско. Тото опізнят середовискове рішыня і не позвалят зачати інвестицию. Як подал бургомайстер Мушыны Ян Ґольба, сут прирыхтуваны, мают выкуплены терены і находят ся они в Пляні Просторного Заґаздуваня з направліньом на тоту інвестицию. Готова єст і концепция. Інвестицию бльокує лем середовискове рішыня. Ґондольова желізниця має быти, по выбудуваній уж видоковій вежы, черговом туристичном атракцийом горы Мальник, а тым самым цілой Мушыны. Вытяг має быти долгій на 1700 м, а нижня стация ґондолі, архітектуром навязуюча до реґіону, буде ся находила на Запопрадю.

Енерґетичны працы в Польковицях

Ґміна Польковиці інформує, што од днес до середы 29. мая можут выступити моментальны перервы в діяню уличного освітліня. Як інформуют працівникы выділу інвестициі, розвитку ґміны і публичных замовлінь в уряді ґміны, TAURON Nowe Technologie S.A. плянує выконати поміры на сервісуваній освітліньовій сіти на обшыри цілой ґміны, заєдно в місті, як і на селах. Як подают, освітліньова сіт єст незалежна од сіти засиляючой м.ін. услуговы локалі, мешканя, і не мат ниякого влияня на достарчаня енерґіі до тых обєктів. В звязку з веденыма енерґетичныма працами можливы сут короткы перервы в діяню освітліня, або залучаня освітліня в протягу дня.