Сумар дня на 24. мая 2022 р.

Приносиме вам сумар медияльной ґрупы ЛЕМ.фм+ на ден 24. мая 2022 р.

Ґміну Польковиці і бургомайстра Польковиц доцінили в загальнопольскым конкурсі

Ґміна Польковиці отримала выріжніня в десятій едициі загальнопольского ранкінґу Денника Ґазеты Правной «Перлины Самоуряду». Єст то уж другій раз, коли ґміна Польковиці находит ся серед найліпшых ґмін в державі в катеґориі містецко-сельскых ґмін. Свою радіст з нагороды передал бургомайстер Польковиц Лукаш Пузнєцкій, котрый тішыт ся, што діяня самоуряду підниманы для розвитку ґміны і з думком о єй жытелях сут достеріганы і высоко оціняны в цілій Польщы. Не лем ґміна, але тіж сам бургомайстер Польковиц был доціненый. Лукашови Пузнєцкому признано выріжніня в катеґориі війтів, бургомайстрів і президентів. І тоту премію президент отримал уж другій раз.

В Устю Рускым одбуде ся першый музичный фестіваль

Команда «BeskidVibe Fest» то ґрупа молодых люди з обшыри ґміны, котра рішыла зорґанізувати штоси, чого іщы в ґміні не было- музичный фестіваль. Цілю акциі єст зінтеґрувати соспільство незалежно од віку ци музичного смаку. На фестівали почути буде мож рок, фольк, рап і блюз. На сцені запрезентує ся тіж ансамбль Руты Увиты і знана уж в Низкым Бескіді Театральна Ґрупа Племя. В часі фестівалю будут ся тіж презентувати локальны ремісникы і артисты. Орґанізаторы мают в плянах і «спільне музикуваня», зато заохочуют приходити зо своіма інструментами. Подія пройде в двох локализациях в Устю – буде лісова сцена, што навязує до натуры, і сцена на стадийоні. Зато же єст то незалежна ініциятива орґанізаторы просят фінансово підтримати першу едицию подіі. Мотузок до колекты найдете на фейсбуковым сайті фестівалю.

Шатрова база в лемківскій хыжы уж готова

Шатрова база Студентского Кружка Бескідскых Провідників Люблин в Завадцій Рыманівскій єст уж готова. Находит ся она в старій деревяній лемківскій хыжы, побудуваній коло 1920 р. В часі Акциі «Вісла» родину, котра в ній мешкала, выселено в околиці Любіна. СКБП Люблин одкупил хыжу в 90. роках ХХ ст. Од того часу помалы ремонтували середину, так жебы мож было принимати в ній гости. Остатнім елементом ремонту была выміна даху, котра зо взгляду на великы кошты лишыла ся на конец. Завдякы колектам зобрали потрібну квоту і скінчыли тырваючый близко 20 років ремонт. В рамках прац не лем здемонтували старе покрытя, але тіж привернули ориґінальну ґеометрию даху. В остатній вікенд червця/юнія в хыжы пройде шторічне рыхтуваня до одкрытя базового сезону. В тым році получене буде зо святкуваньом закінчыня ремонтовых прац. Деталі находят ся на фейсбуковым сайті подіі.

В Святковій Великій зміны на дорозі

Повітовый Заряд Доріг в Яслі інформує, што в звязку з погіршаючым ся технічным станом покрытя на повітовій дорозі з Контів до Святковой Малой на короткым одтинку в Святковій Великій обовязує зужыня дорогы. Рішыня спричынене єст зсуніньом дорогы, што становит загорожыня безпекы руху. Зужыня буде обовязувало до 31. грудня/децембра тр., хыбаль же роботы при направі дорогы закінчат ся скорше, по тым часі на дорогу винна вернути дотеперішня орґанізация руху.

Ґалицийска Торговиця Інструментів

На конец музична подія з ґорлицкого повіту. В найблизшу суботу, 28. мая, в Каштели в Шымбарку одбуде ся «Ґалицийска Торговиця Інструментів». Подія посвячена єст творіню музичных інструментів і самому музикуваню ци гуляню. В проґрамі акциі находят ся концерты, спільне музикуваня, выставы і варштаты.

fot. fb SKPb Lublin