Сумар дня на 24. мая 2021 р.

Приносиме вам сумар медияльной ґрупы ЛЕМ.фм+ на ден 24. мая 2021 р.

Спишме ся Лемками

Од початку квітня/апріля тр. тырват в Польщы Нацийональне Повселюдне Списуваня. Згідно з законом о публичній статистиці участ в списуваню єст обовязкова. Проходит оно головні в інтернетовій формі, але єст тіж можливіст списати ся через телефон. Од 4. мая працу в рамках Нацийонального Повселюдного Списуваня зачали телефонічны рахмайстры – поможут ся они списати респондентам, якы дотля не списали ся самы через інтернетовый формуляр або списову інфоленію. Рахмайстер може задзвонити лем з двох номерів: 22 828 88 88 або 22 279 99 99. З огляду на пандемію, до одкликаня рахмайстры не будут одвиджати респондентів в іх хыжах. Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного спису сут особливо важны дла лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык. Можете тото зробити максимально до кінця вересня/септембра 2021 рока.

На Івонці побудуют бобслейовый тор

За Радийом Краків, в 2023 році на схылі горы Івонка в Креници має рушыти будова першого в Польщы бобслейового тору. Кошт інвестициі то около 100 млн злотых. О будові тору в Креници фінально рішыл Польскій Союз Бобслейовых Спортів вчас посліднього свого засіданя в Щырку. Власти курорту вказали на локализацию обєкту схыл горы Івонка. Знана є уж концепция проєкту, дослідженый терен і ґрунт, вшытко так, жебы сполнити вымогы федерациі і мочы гын орґанізувати медженародны змаганя ци чемпіонат світа. Проєкт тору мал бы быти готовый в будучым році, а будова має быти вписана на спис пріоритетовых задач Міністерства Спорту і рушыти рік пізнійше. Понад десят років тому прібувано уж побудувати бобслейовый тор в Креници на Парковій Горі. Думкы не повело ся зреализувати зо взгляду на протесты еколоґів і рішыня Найвысшого Адміністрацийного Суду.

Выстава творів Никыфора в Кєльцях

О нецілый місяц, в четвер, 17. червця/юнія, в Музею Діалоґу Культур в Кєльцях буде одкрыта выстава малярскых творів вызнаного во світі лемківского маларя Епифана Дровняка. Вказувана збірка походит з Округового Музею в Новым Санчы і Нацийонального Музею в Кєльцях. Выстава буде чыслила понад 40 елементів. Образы Никыфора мож буде обзерати в Музею Діалоґу Культур в Кєльцях до 29. серпня/авґуста.

Закрытый шляк в Татряньскым Нацийональным Парку

Татряньскій Нацийональный Парк поінформувал на своім фейсбуковым профіли, што од днес, 24. мая, до одкликаня закрытый буде шляк од Поляны Калятівкы до колибы на Кондратовій Поляні в обі страны. Тырвают роботы, в рамках якых доводит ся канализацийну сіт до колибы на Кондратовій Поляні. Працы правдоподібно поведе ся завершыти іщы перед вакацийным сезоном. Дальшы інформациі о даті одкрытя шляку будут публикуваны на профіли Парку.