Сумар дня на 24. марця 2025 р.

Приносиме вам сумар медияльной ґрупы ЛЕМ.фм+ на ден 24. марця 2025 р.

Загальне зобраня членів Стоваришыня «Руска Бурса» в Ґорлицях

В суботу, 22. марця в просторах ґорлицкой Руской Бурсы одбыло ся загальне зобраня членів Стоваришыня «Руска Бурса» в Ґорлицях. На стрічы была підсумувана діяльніст общества за минулый рік, выбраны власти на дальшу каденцию і накрислены пляны на будуче. Присутным бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови. Через голосуваня, присутны за ведучу заряду Руской Бурсы на дальшу річну каденцию зас выбрали Наталию Малецку-Новак. На засіданю были порушены тіж актуальны справы і ведены проєкты, але і тото, што орґанізация плянує реализувати в 2025 р. По загальным зобраню прошла тіж в Рускій Бурсі стріча членів редакциі радия і порталю ЛЕМ.фм.

Грекокатолицкы єрархы з Мадяр і Словациі стрітили ся на Раді Єрархів. Одсвяткували 10. річницю зряджыня Митрополиі на Мадярах

Як інформувал Пресовый Центр Кошыцкой Єпархіі, грекокатолицкы єрархы з Мадяр 19. марца стрітили ся в Марияповчы, жебы вєдно з єпископами зо Словациі засідати на Раді Єрархів, і одсвяткувати тым 10. річницю зряджыня митрополиі. Владыкы дискутували о важных вопросах, котры тыкают обидвох церкви. Вечером заполнили базилику в Марияповчы вірны і священникы на Літургіі оперед посвяченых дарів, в котрій взяли участ і єпископы. Вєдно подякували за десят років митрополиі на Мадярах. Докладні 10 років тому, 19. марця 2015 р. папа римскый Франциск основал Грекокатолицку Митрополию на Мадярах. Головны святкуваня маютпроходити серпни/авґусті підчас великого одпусту в Марияповчы, єдного з найвызначнійшых історичных одпустовых місц грекокатоликів русиньской традициі. Веце на тоту тему прочытате на нашым портали.

Одтинок воєвідской дорогы 971 в Жеґєстові буде запераный в ночы

Од 1. квітня/апріля одтинок воєвідской дорогы нр 971 в Жеґєстові буде запераный в годинах 20.00-6.00 од понеділька вечером до суботы рано. Зачне ся черговый етап робіт при осувиску. Дальше буде обовязувало ограничыня тонажу до 7,5 тоны в годинах 6.00-20.00 і дни вільны од працы. Пляново дорога буде в ночы заперана до кінця мая. Єднак як інформує выконавця, термін тот може ся змінити в залежности од етапу заплянуваных прац, але і утруднінь звязаных з ноторичным недотримуваньом переписів односно тонажу.

Просиме до Руской Бурсы на черговый показ спектаклю «Три ябка»!

Уж в найблизшу суботу 29. марця просиме до Руской Бурсы в Ґорлицях на черговый показ спектаклю «Три ябка». Початок о 19.00 год. В минулым році Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію, і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, але делікатно іх прифарблює лемківскыма реалиями. Пєса была писана на конкретны три акторкы: в ролях выступуют Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, і зо сценоґрафійом поміг Мирко Пелехач. Премєра одбыла ся в минулым місяци. Пєса «Три ябка» могла быти зреализувана завдякы підпорі Міністерства Внутрішніх Справ і Адміністрациі. Спектакль єст в лемківскым языку, для осіб выже 16 рока жытя. Красні просиме!