Сумар дня на 24. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2025 р.

Зміны во вчыню чужого языка для учеників меншын

Міністерство Едукациі і Наукы заповідат зміны во вчыню чужого языка для учеників, котры вчат ся меншынового языка. Проєкт розпоряджыня зміняючого розпоряджыня в справі оціняня, клясифікуваня і промуваня учеників і слухачів в публичных школах явил ся на сайті Урядового Центра Леґісляциі. Як мож чытати в описі проєкту: «Проєктуване розпоряджыня передвидує введіня зміны, основа якой в тым, жебы уможливити звільніня учеників VII i VIII кляс основной школы, реализуючых вчыня языка нацийональной меншыны, етнічной меншыны або реґіонального языка з вчыня другого чужого новожытного языка. Звільніня такє было бы уділяне директором школы до кінця даного шкільного рока (…) на основі внеску родичів ученика». Зміна розпоряджыня выникат з рішынь піднятых підчас засіданя Ґрупы дс. Едукациі Спільной Комісиі Уряду та Нацийональных і Етнічных Меншын в грудни/децембрі минулого рока. Члены ґрупы звернули товды увагу на перетяжыня учеників, котры додатково вчат ся меншынового языка. Зміна розпоряджыня спричынит, што ученикы, котры реализуют вчыня меншынового языка, а в сумі вчат ся трьох языків (штырьох рахуючы польскій язык), будут мати о 2 годины тыжньово меншый вымір годин обовязковых едукацийных занять. Розпоряджыня мало бы обовязувати од 1. вересня/септембра тр.

Выборы до Рады Влады СР про нацийональны меншыны. Трьох членів выбрали Русины

Нацийональны орґанізациі выбрали сой членів Палаты Нацийональных Меншын Рады Влады Словацкой Республикы про нацийональны меншыны. Результаты голосуваня были опубликуваны в пятницю 21. лютого/фебруара на офіцияльным сайті Уряду Полномічного СР про нацийональны меншыны. Выли то першы выборы до Рады. В першым засіданю в січни/януарі тр. взяли участ за окремы меншыны члены, котры были перед тым членами Выбору про нацийональны і етнічны ґрупы Рады Влады Словацкой Республикы про людскы права, нацийональны меншыны і родову рівніст. В новоствореній Раді Русины мают трьох членів, як і в попереднім выборі. За русиньску меншыну до Рады было девят кандидатів. В результаті голосуваня членами Рады Влады СР про нацийональны меншыны стали Петро Медвідь, Мартін Караш і Мілян Ян Піліп. Заступцями членів стали Александер Онуфрак, Мирослав Кереканич, Ян Маґура, Петро Штефаняк і Матфей Допіряк. Веце на тоту тему чытайте на нашым портали.

Утрудніня для пасажерів желізниці медже Креницьом і Старым Санчом

Рушат модернізация перонів на осмох стациях і желізничных пристанках в долині Попраду. В звязку з тым од 1. марця подорожуючых желізницьом на трасі Крениця – Старый Санч ждут утрудніня. До 11. червця/юнія за потягы на тій трасі (получыня PKP Intercity і PolRegio) будут іздити заступчы автобусы. Заплянуваны працы сут частю проєкту, обнимаючого модернізацию 13 стаций і пристанків на леніі нр 96 Тарнів – Лелюхів і на леніі нр 105 Мушына – Крениця. Інвестиция єст реализувана в рамках урядового проґраму будовы або модернізациі желізничных пристанків на рокы 2021-2025. Єй кошт то понад 73 млн злотых. В минулым році спілка PKP змодернізувала пероны на пристанку Андриівка і на стациі Тухів. Тепер працы ведены сут на стациях Рытро і Мушына.