Сумар дня на 24. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 234. листопада/новембра 2021 р.

Засіданя Медженародной Консерваторской Рады ЮНЕСКО. Были в Туряньску, Команчы і Саноку

В днях 15.-17. листопада/новембра в Ряшові проходило засіданя Медженародной Консерваторской Рады ЮНЕСКО – Деревяны церкви в польскым і украіньскым реґіоні Карпат. Взяли в ним участ представникы Польщы і Украіны, ґаздове обєктів вписаных на листу світовой спадковины ЮНЕСКО, представникы консерваторскых служб та Нацийонального Інституту Спадковины з Варшавы, Кракова і Ряшова, а тіж представникы Державного Історично-Архітектурного Резервату в Жолкві і Науково-Бадавчого Інституту Досліджынь Памятників в Кыйові. Стріча складала ся з двох основных елементів: студийной візиты в церкви покровы св. Михала Архангела в Туряньску, церкви покровы Богородиці в Команчы і Музею Народного Будівництва в Саноку та з Пленарного Засіданя Консерваторской Рады. В часі другой части выголошены были доповіди з обшыри охороны памятників. О рік подібна стріча пройде на Украіні.

В Дукли будут підземны просторы

В Дукли проходит ремонт головного пляцу місточка. В часі робіт на дукляньскым рынку одкрыли памятниковы пивниці, якы находят ся під площыном пляцу в західній його части. Будут они выремонтуваны і презентуваны як дальша атракция місточка, плянуют робити гын м.ін. выставы. В рамках ґрунтовного ремонту рынку медже інчыма вытяли пару дерев, што не сподабало ся некотрым жытелям. Самоурядовы власти вытинку арґументували тым, што корені розсаджали скліпліня пивниц і, як выказала експертиза, необхідне было вытяти рослины. Ремонт веденый єст під контрольом археолоґів, але нихто не сподіват ся дальшых несподіванок. Роботы в рынку не обнимают памятникового ратуша, котрый не єст уж власністю міста – одзыскала го родина Тарновскых.

Зачаток зимового сезону

Кєд вшытко піде згідні з пляном, то уж заран буде мож зачати сезон ізды на лыжах. До одкрытя сезону уж од парунадцетьох днів рыхтує ся стация Master Ski в Тыличы. Як подає менаджер вытягу Бартломєй Мєйскій, климат Тылича спричынят, што аж і коли всядиль довкола неє морозу, то в тылицкій долині приморозкы ся появляют, а нічны температуры -4, -5 градусів дозваляют зрыхтувати убочы. Од минулой пянтиці вельо лыжных осередків зачало продавати скіпасы, хоц самы вытягы іщы не діют. Векшіст осередків думат зачати сезон в половині грудня/децембра. Уж тепер тестуют системы насніжаня, на убочах уставляют сніговы арматкы, ведены сут пробны евакуациі з креселок і обовязково – технічны перегляды вытягів. Ціны скіпасів залежат од того, ци купуєме іх скорше через інтернет, ци на місци і в якым терміні хочеме іздити. Найдорожшым періодом буде тот од 26. грудня/децембра до 9. січня/януара 2022 р.

Одышол послідній активный мазяр

На 81 році жытя вмер послідній лосяньскій мазяр – Михал Губяк (1939-2021). Покійный мазярского фаху навчыл ся од свого няня і стрыка. Михал Губяк на своі першы мазярскы вандрівкы выізджал як парулітній хлопчыско. Был помічником на возі свого няня і стрыка – лосяньскых мазярів. Вєдно зо смертьом Покійного кінчыт ся період прекрасной лосяньской професиі. Остатніма, окрем бл. п. Михала Губяка, якы занимали ся мазярством, были Петро Шлянта (1925-2017) і Григорий Євусяк (1925-2021). Послідні мазярі дбали на тото, жебы істория мазярства была популяризувана і переказувана дальшым ґенерациям. Похорон Михалa Губякa проходит днес в грекокатолицкій церкви Рождества Пресвятой Богородиці в Лоси.

Фот. Фб-профіль Роберт Ковальскій