Сумар дня на 24. липця/юлия 2023 р.

Приносиме вам сумар медияльной ґрупы ЛЕМ.фм+ на ден 24. липця/юлия 2023 р.

Tеатральна Ґрупа з Устя Руского просит на премєру спектаклю «Бомбель»

Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя просят на премєру спектаклю «Бомбель» зрыхтуваного на основі оповіданя Мирка Нагача з тым самым наголовком. Театральня адаптация оповіданя єст можлива завдякы дотациі Театрального Інституту ім. Збіґнєва Рашевского, котрый початком рока оголосил конкурс внесків на дофінансуваня. Серед 150 проєктів выбрано 20, а серед них думку на адаптацию «Бомбля». Спектакль вырежысерувала Моніка Бабуля – думкодавчыня і ініцияторка театральной адаптациі, разом з Мариюшом Лясковскым. Не єст то іх перша спільна робота, скорше разом працували м.ін. в режысериі популярного і доціняного спектаклю «Бескідзкы Дзяды». Премєра «Бомбля» пройде 26. серпня/авґуста о 20.00 год. на сцені в Ждыни при ватровиску. Што важне, спектакль презначеный єст лем для дорослых обзерачів.

Вмер Андрий Сухорскій

З жальом інформуєме, што в минулым тыжни вмер русиньскій скульптор Андрий Сухорскій. Родил ся він в 1929 році на Лемковині, в Вільці і так як його прадідо, дідо і няньо од наймолодшых років занимал ся різбліньом в дереві. Його творы од початку захопляли техніком і дрібницями. В 1945 р. Сухорскій з родином был примусово выселеный на Украіну, де оселил ся в околицях Тернополя. Долгій час артиста старал ся запрезентувати своі різбы шырші публиці, аж в 1947 р. трафил до Нацийонального Музею ви Львові, де одраз доцінено його талант. Сухорскій в своіх творах інспірувал ся Лемковином, жытьом та фауном і флором місця, одкале походил. Найбарже знаны його творы то м.ін. «Лемко», «В паньскым лісі» ци «Лемківскій різбляр» і присвячена жервам Акциі «Вісла» праца під наголовком «Переселіня Лемків». Сухорскій ціле жытя промувал памят о Лемках – так через свій вклад в культуру, як і вказуваня свойой достоменности. Вічна памят!

Карпатска стріча – про Музей Лемківской Культуры в Зындрановій

Карпатскє Товариство просит на сему в тым році віртуальну стрічу з циклю «Карпатскых стріч». Бесіду о Музею Лемківской Культуры в Зындрановій вюл буде Богдан Ґоч, сын основателя музею Феодора Ґоча. Богдан Ґоч єст тепер директором музею, тіж лемківскым діячом, ведучым Рады Товариства для Розвитку Музею в Зындрановій і членом Карпатского Товариства. В часі бесіды мож буде послухати так о початках музею і проблемах, з котрыма борол ся його основател, як і о теперішніх новинках і плянах на будучы рокы. Стріча пройде на плятформі Zoom і трансмітувана буде на каналі на Youtube. Участникы, котры хотят брати участ в дискусиі, прошены сут о скорше зголошыня, орґанізаторы дадут доступ до плятформы з бесідом. Дрібниці найдете на сайті Карпатского Товариства.

«Од Русаль до Яна»

Лишаючы ся в Зындрановій, Музей Лемківской Культуры просит до участи в подіі «Од Русаль до Яна», котра пройде на обшыри музею в остатній вікенд липця/юлия, 29. і 30. В проґрамі на першый ден акциі находит ся м.ін. звиджаня музею, ріжного рода прелекциі, промоция публикациі «Павел Стефановскій. Выбраны вершы» і концерты ансамблів з Польщы і Словациі. Другій ден подіі зачне ся од святой літургіі в церкви в Зындрановій, а пак пройде офіцияльне одкрытя свята. В дальшій части проґраму находят ся концерты, а тіж розмаіты конкурсы і забавы, пройдут тіж показы народного ремесла.