Сумар дня на 24. липця/юлия 2019 р.

Приносиме Вам сумар медияльной ґрупы ЛЕМ.фм на ден 24. липця/юлия 2019 р.

Роверовый Райд і Родинный Пікнік в Шымбарку

Музей Дворы Карвациянів і Ґладышів в Ґорлицях, одділіня Скансен Погіряньского Села ім. проф. Р. Райнфуса в Шымбарку просит на роверовый райд і родинный пікнік. Будут они проходити 3. серпня/авґуста. Хто має дяку взяти участ в VIII Етноґрафічным Роверовым Райді Слідами проф. Романа Райнфуса, має до выбору 3 трасы долгости 45, 30 або 10 км. Послідню, найкоротшу трасу мож тіж перейти. Трасы ведут через лемківскы села – Білянку і Лося, а метом буде Скансен Погіряньского Села в Шымбарку, де в тот сам ден о год. 16.30 прелекцийом Кристины Райнфус-Януш зачне ся Родинный Пікнік. Пак буде мож послухати концерту народной музикы, взяти участ в едукацийных варштатах і конкурсах та попрібувати реґіональны стравы. Вступне на Родинный Пікнік то лем злотівка. Вписове на роверовый райд то 10 злoтых – в тым єст звиджаня, почастунок, напиток, дрібны памяткы та вступне на пікнік.

Чытаня книжкы «Порожній ліс» в Волівци

В найблизшу суботу, 27. липця/юлия, о 20.00 год. в Волівци почути буде мож фраґменты книжкы «Порожній ліс», якы чытаны будут авторком публикациі, Моніком Шнайдерман. «Порожній ліс» описує жытя в лемківскым Волівци, де видно іщы сліды по давных його жытелях. Вказує на контраст теперішнього, штоденного жытя з тым, што был ту колиси інчый світ, котрый уж ниґда не верне, а о котрым припоминают дикы сады, зруйнуваны церкви, безіменны церковны памятникы. «Порожній ліс» Монікы Шнайдерман оддає тіж пошану для того місця на земли, його істориі, природы і давных мешканців. Чытаню книжкы товаришыти будут показ музичного фільму «В тым місци» та концерт Опля «Обертасы» на електричну ґітару і перкусию. Орґанізаторы просят взяти зо собом коцы або креселка. Вступне дармо.

Зындранівска Стріча Вескідників

В тот сам ден, 27. липця/юлия, зачне ся акция, яка товаришыт тогорічнній едиці подіі «Од Русаль до Яна», котру орґанізує Музей Лемківской Культуры в Зындрановій. Є то Зындранівска Стріча Бескідників, на котру просит Стоваришыня «Unia Przedsiębiorczych» з Коросна. Подія має навязувати до традицийных гірскых райдів, в часі котрых туристы ставляли шатра і вечерами під одкрытым небом співали пісні і співанкы. Базом тогорічного райду буде пляц при Народным Домі в Зындрановій, де участникы акциі при нагоді «Од Русаль до Яна» будут мочы почути лемківску музику ци спрібувати реґіональны стравы.