Сумар дня на 24. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 24. квітня/апріля 2020 р.

Ци поміч для меншын може быти несправедлива?

Воєвідскій Уряд оферує поміч для самоурядів. Переданы можут быти дармовы середкы особистой охороны до тых ґмін, де жыют нацийональны і етнічны меншыны. Службы Малопольского Воєводы скєрували за посередництвом полномічной дс. меншын Евы Подленцкой звіданя, ци поєдны ґміны хотят отримати середкы особистой охороны, як напр. плыны до дезинфекциі рук. Мают то быти дармовы середкы і трафити м.ін. до ромской соспільности в Лимановій і околицях. Справа выкликує єднак контроверсиі. Війт Ґміны Лиманова Ян Скжекут зголосил запотрібуваня, але уж бургомайстер міста Лиманова Владислав Бєда ствердил, же з помочы не скорыстат, бо в деякій мірі є то дискримінация єдных жытелів коштом другых. В подібным тоні выповіли ся війтове ґмін Лонцко і Коростенко над Дунайцьом, але оба скорыстали з помочы воєвісдтва для своіх ґмін.

Меншыновы проґрамы будут дале продукуваны і емітуваны – становиско TVP3 Białystok

В навязаню до інформаций поміщаных в інтернеті і друкуваній пресі, а тыкаючых проґрамів меншын, якы вказуют ся на антені телевізиі TVP3 Białystok, речена телевізия помістила оголошыня, в котрым дементує вісти, же знятый буде з антены проґрам присвяченый білорускій меншыні пн. «Білорускій Тыжден». В оголошыню подали, што николи не підняли такого рішня, ани не думали над таком можливістю. Пояснили, што з увагы на конечніст запевніня безпекы працівникам польской телевізиі в звязку з пандемійом введено ротацию працівників та приписано ім одповідні ґрупы. Редактор Миколай Вавженюк, одповідальный за продукцию проґраму «Білорускій Тыжден», мал быти про тото поінформуваный, як тіж мал быти запевненый, што коли награный проґрам достарчыт до телевізиі, то буде він выемітуваный. В інформациі написали і, што вшыткы проґрамы емітуваны TVP3 Białystok, як напр. «Татарскы Вісти», «Мы Ромы» ци «Украіньскій Перегляд», будут дале продукуваны і емітуваны.

СМС-ы про кварантанну аж і товды коли границі ани сме не перешли

Находячы ся в приграничній обшыри, мож достати смс од Урядового Центра Безпекы, без взгляду на тото, ци границю ся направду перешло, што в звязку з перекрочыньом границі необхідне є піддати ся 14-дньовій кварантанні. Жытелі приграничных сел, як прим. Барвінка ци Зындрановы, алярмуют, што фурт достают такы смс-ы. Справа є знана Граничным Службам, якы подают, што відомости не мают правной силы, а кварантанна обовязує выключні по фізичным перекрочыню границі. Смс о кварантанні приходит автоматичні по залоґуваню ся телефону до стациі ҐСМ заграничного оператора. В відомости находит ся мотузок до аплікациі «Домашня кварантанна». Особы, котры не переходят границі, не повинны єй інсталювати. В примірі зареґіструваня ся в аплікациі будут трактуваны як особы, котры сут зобовязаны быти в кварантанні. Неє можливости резиґнациі з отримуваня алертів УЦБ, але мож выелімінувати непотрібне лоґуваня ся до чужой сіти. Треба в телефоні вылучыти roaming або выбрати свою сіт як постійну.

Куп знимку Варголя, поможеш інчым артистам

Од 28. квітня/апріля до 6. мая буде проходила авкция пн. «Andy Warhol: Better Days». Є то 60 знимок Варголя презентуючых просты приємности звязаны з інтеракцийом чловека. Дохід з авкциі переданый буде на підпору фонду на поміч для артистів. Andy Warhol Foundation for the Visual Arts одкрыл проґрам помочы для артистів початком того місяця в одповіди на пандемію. Початковый буджет выносил 1,6 млн дулярів. Авкциі ведены сут каждого тыжня. Підпору выплатили уж артистам – каждый достал по 100 тис. дулярів. Авкция має підперти проґрам о додатковы 2,6 млн дулярів. Тіж і інчы американьскы інституциі оферуют поміч артистам, якы нашли ся в тяжкій ситуациі. Серед них сут м.ін. авкцийный дом Phillips, якій спілпрацує з фондом Robin Hood, The Getty Trust ци Hauser & Wirth.