Сумар дня на 24. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 24. червця/юнія 2020 р.

Поміч для села Пыхні

Минулый дощовый вікенд принюс вельо злого. Міцно потерпіло м.ін. русиньскє село Пыхні в окресі Снина. Величезны зливы знищыли праві вшытко. З водом бороти мусіли ся так само і село Зубне в окресі Гуменне, і окресне місто Снина. Вода заляла хыжы, знищыла уроджай, розвалила плоты, будовы, понищыла авта, дорогы, пішникы – вода была в силі выдерти асфальт, в Зубным зорвало міст, в Снині заляло хыжы. Борба з дощом і принесеном водом тырвала до неділі. Іщы в суботу поміч Пыхням обіцял председа Нацийональной Рады Словациі Борис Коллар, якій был на місци видіти шкоды. Страты рахуют на 100 тис. евро. На місци присутны были і міністер внутрішніх справ Роман Мікулец та віцежупан Пряшівского Самосправного Краю Йозеф Лукач. Конкретну поміч русиньскым Пыхням уж в понедільок, 22. червця/юнія, схвалили пряшівскы крайскы депутаты. Передадут селу 600 тис. евро. Мож тіж індивідуальні вплачати грошы на поміч Пыняням через выділеный банковый рахунок. Номер подаєме на портали.

Л. Буковскій о меншынах

В бесіді для аґентуры SITA полномічный влады Словацкой Республикы про нацийональны меншыны Ласло Буковскій повіл, што ефективну меншынову політику не мож робити без синерґіі державы і самосправ, што охорона ци розвиток языка, але так само культуры і ідентичносты, не можут быти квестийом фінансуваня, але мусят быти рішаны комплексово. Подля його слів, важным є, жебы то самы меншыны могли рішати о своіх справах, або хоц могли ся в тых справах голосно выражати. Тот принцип, подля становиска Буковского, веде ґу спомаліню асиміляциі і утриманю розмаітости в соспільности. Додал, што членів меншыны не мож постерігати як скансен, котрый репрезентує лем свою архаічну культуру і незрозумілый язык, але што меншыны потрібуют розвивати ся в условіях ХХІ столітя.

Перехід долином Тихані

Од. 13. червця/юнія до кінця вересня/септембра Маґурскій Нацийональный Парк удоступнят до зорґанізуваного переходу з працівником парку або вызначеным провідником трасу долином Тихані. Прогулькы проходити будут в суботы і неділі. Обовязуют скоршы записы. Долину неістнуючого лемківского села Тиханя вважат ся єдном з красшых долин Низкого Бескіду. Парогодинна прогулька обнимат перехід з колибы Гайстра долином Тихані до старой дорогы Крампна-Ожынна, пак поворот до Гуты Поляньской. Наштоден траса тота є недоступна для туристів. Можливый є перехід трасом зо своім провідником, але з ліценцийом парку, з ґрупом не більшом як 30 осіб, по скоршым зголошыню і добесідуваню терміну. Перехід трасом є платный згідні з цінником, якій обовязує за вхід на обшыр Маґурского Нацийонального Парку.

О женах важных для Енді Варголя

Од пятниці, 26. червця/юнія тр., буде мож видіти в пітсбуржскым Музею Енді Варголя выставу «Femme Touch». Од трансджендеровых ікон та мужніх сильных членкынь підземной сцены по матір артисты Юлию і його недошлу вбивчыню – жены і фемміны Варгольового світа одограли ключову ролю во вшыткых обшырях його жытя і штукы. Выстава зосередит ся на вказаню історий жен, котрых вклад часто поминят ся в переказах про Варголя. В музейній ґалериі на другым поверху промітаны будут рідкы кольоровы фільмы Варголя та популярны образы, котры дозволят на нову наррацию в однесіню до представленых осіб. «Femme Touch» переформит тіж пят поверхів постійной колекциі музею, жебы уставити роботы Варголя в позициі діалоґу з артефактами і творами штукы з жытя сесых фасцинуючых жен. Експозиция принесе тіж множество одновленых і здіґіталізуваных обєктів, котры походят з музейного архіву. Выставу буде мож видіти до 3. січня/януара 2021 р.