Сумар дня на 23. січня/януара 2025 р.

Приносиме вам сумар медияльной ґрупы ЛЕМ.фм+ на ден 23. січня/януара 2025 р.

Музей в Зындрановій закрытый

Музей Лемківской Культуры в Зындрановій од 1. лютого/фебруара завішат свою діяльніст. Причыном є брак одповіднього фінансуваня діяльности Музею зо стороны Міністерства Внутрішніх Справ і Адміністрациі. Подібна ситуация была уж пару років тому. Як подают представникы Музею, за такы грошы, як признаны МВСіА на 2025 р., Музей не є силі забезпечыти нормального функцийонуваня. Ци взновит він свою діяльніст – буде залежне од того, ци поведе ся отримати высшы середкы або середкы з інчых джерел на його фунцийонуваня. Музей Лемківской Культуры в Зындрановій буде закрытый для звиджаючых до одкликаня.

Музею на обшыри ПСК радо одвиджаны

За культуром до музеів і ґалерий Пряшівского Самосправного Краю пришло в 2024 р. 440 тис. люди, з того 400 тис. завитало лем до музеів. Найвеце люди, аж 205 тис., однотувано зас в Любовняньскым Музею – на граді в Старій Любовни. Припоминаме, што і в минулым році быв запертый Музей Модерной Штуйы Енді Варголя в Меджелабірцях, в будинку котрого проходит великій ремонт. І так до Старой Любовні люди притягла выняткова выстава комплетного портфолийо Королевы Нытомбі, котра выникла як спілпраца медже Любовняньскым Музейом і Музейом Енді Варголя. Творы Варголя мож было влони видіти і за границями Словациі. Звекшыло ся тіж чысло одвиджынь в Шаришскым Музею в Бардийові. Выгорлятскій Музей в Гуменным приготовлює приповідковы експозициі, вечерні концерты на дворі каштеля ци театр в скансені. Шаришскій Музей в Бардийові, конкретно скансен в Бардиівскых Купелях, того рока одсвяткує 60 років од свого отворіня. Так само 40 років свого істнуваня одсвяткує скансен під градом Любовня.

Засідала Рада Інситуту Языковой Ріжнородности

В понедільок одбыло ся перше в тым році засіданя Проґрамовой Рады Інституту Языковой Ріжнорідности. В єй склад входят представникы світа наукы і культуры та особы поданы Міністерством Едукациі ци Міністерством Внутрнішніх Справ і Адміністрациі. Своіх представників має тіж СКУтНіЕМ. В Проґрамовій Раді засідат тіж Лемкыня, др габ. Олена Дуць-Файфер. Стрічу одкрыла презентация о польскым міґовым языку. Представлено проблемы, з якыма міряют ся глухы особы в Польщы. Др Пьотр Шатковскій выголосил доповід на тему того, што треба робити, жебы меншыновы языкы являли ся тіж в моделях штучной інтеліґенциі. Полну реляцию з засіданя мож чытати на сайті Інституту.

Стоваришыня Лемків по першым засіданю в 2025 році

Як інформувало Стоваришыня Лемків, одбыла ся перша в тым році стріча Головного Заряду орґанізациі. Присутны дебатували і рішали о будучых діянях в 2025 році, в звязку з оголошыньом результатів конкурсів оферт на меншынову діяльніст орґанізуваных Міністерством Внутрішных Справ і Адміністарциі. Стоваришыня Лемків зорґанізує шор подій, в тым м.ін. 45. Лемківску Ватру на Чужыні ци 18. Стрічы Трьох Поколінь з Лемківском Культуром в Пшемкові. Будут дальше выдываны часопис «Бесіда» і «Лемківскій Річник 2025». Ведена буде діяльніст лемківскых ансамблів: Ластівочка і Ластівчата. 45. Лемківска Ватра на Чужыні одбуде ся 8.-9. серпня/ авґуста. Скорше, бо 5.-8. ьервця/юнія члены Стоваришыня Лемків возмут участ в 18. Світовым Конґресі Русинів, што одбуде ся в Букарешті в Румуніі.