Сумар дня на 23. січня/януара 2023 р.

Приносиме вам сумар медияльной ґрупы ЛЕМ.фм+ на ден 23. січня/януара 2023 р.

Желізницьом з Мушыны до Попраду уж лем місяц

Лем місяц мож іщы хоснувати вікендове желізницьове получыня Мушына – Попрад. В остатніх роках было оно барз популярне серед польскых і словацкых туристів. Потяг ходит в суботы і неділі, в обі страны рано і пополудни. Подорож тырват нецілы дві годины і веде м.ін. через Стару Любовню ци Кежмарок. В самым Попраді мож ся пересісти на гірску желізницю і достати до Щырбского Озера в Татрах. Медженародный склад буде курсувал на трасі Мушына – Попрад Татры іщы лем до 26. лютого/фебруара тр. Курс буде пак взновленый аж в літнім сезоні – получыньом леніі Мушына-Попрад поіхаме товды в вікенды, в періоді од 3. червця/юнія до 3. вересня/септембра.

Затікаюча стріха в Музею Модерной Штукы Енді Варголя

Музей Модерной Штукы Енді Варголя в Меджелабірцях актуально рішат проблем з затікаючом стріхом. Затіканя достерегли в части постійной експозициі творів Енді Варголя, коли надышло отепліня і зачал ся топити сніг. Близко 60 творів было перенесеных до депозиту, де мают добры условія з наставленом оптимальном теплотом і вільгітністю. Дакілько творів было пак переінсталюваных до резервовой салі в рамках музею. Як повіла для аґентуры ТАСР заступничка директора музею Івета Русинкова, перенесены творы не сут нияк пошкоджены. Музей є уж одкрытый, але дах протікат і част постійной експозициі є дальше закрыта про одвиджаючых. Музейна стріха была послідній раз реконструувана в 2010 р. На велику реконструкцию цілого обєкту выділила грошы іщы в 2019 р. попередня влада, в сумі 7,1 млн евро. Роботы дотля не были зачати з фінансовых причын. Підчас робліня проєктовой документациі, в результаті збільшаня ся рынковых цін, підняли ся інвестицийны вытраты проєкту о близко 80%, значыт веце як 12,7 млн евро. Більше на тоту тему прочытате на нашым портали.

Новый туристичный комунікат БНП

Бєщадскій Нацийональный Парк выдал новый туристичный комунікат. Актуально обставины до гірскых вандрівок сут тяжкы. З причыны опадів на шляках находит ся верства мокрого і тяжкого снігу. В звязку з проґнозуваныма інтенсивныма опадами, в вельох місцях шлякы можут быти невыдоптаны і задуты. Плянуючы долшу вандрівку, конечно треба взяти до увагы выдолженый час переходу. Природникы просят заховати осторожніст особливо на залісеных одтинках пути, кєд же над стежками може вісіти голузя, што обтяжене єст снігом і ледом. Додатково мож ся сподівати сильного вітру, аж і до 110 км/г. Актуальна хвиля вымагат специяльистичного прирыхтуваня, властивой оціны ситуациі, одповіднього облечыня, рачків, кыйків, і дрібницьового заплянуваня вандрівкы. Актуальну хвилю мож провірити примірно на інтернетовым сайті GOPR ци інтернетовых камерах БНП.

Зимовы вакациі в нацийональных парках

Рушыла зимова едиция едукацийного проґраму «ПоШлякы», орґанізуваного Татряньскым Нацийональным Парком. Занятя будут ся одбывати до 25. лютого/фебруара. Цілый тот час проходити будут едукацийны прелекциі і природничы прогулькы та зимовы природничо-плястичны варштаты, якы ся одбудут і в онляйновым просторі. Записы і полный гармоноґрам проґраму «Пошлякы» находят ся на інтернетовым сайті Татряньского Нацийонального Парку. Зимовый вакациі тырвают уж і в Маґурскым Нацийональным Парку. В рамках проґраму «Познаєме парк зимом» працівникы зрыхтували м.ін. дармовы тематичны прогулькы і занятя для діти. Так само обовязуют скоршы записы. Стрічы можут быти одкликаны з причыны планных погодовых обставин, великого морозу, сніжыці, ци сильного вітру.