Сумар дня на 23. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 23. листопада/новембра 2022 р.

Апель ощаджати воду

В остатніх днях староста ґорлицкого повіту Мария Ґубала звернула ся з апельом до жытелів повіту ощаджати воду. В оголошыню староста подає, што в звязку з нехосенныма метеоролоґічныма обставинами в остатнім часі, іде о брак опадів, значучо обнижыла ся кількіст ґрунтовой воды і воды в глубиновых студнях. Звертат ся зато з прошыньом, жебы жытелі ґмін і міст повіту розважно ґаздували водом, хоснували єй выключні на необхідны до жытя потребы, а жебы стримати ся од напр. мытя авт ци інчого ґратя, ґаражів ітп.

Шымон Моджєвскій про ремонтуваня лемківскых крестів

В найблизшым часі пройде чергова онляйнова Карпатска Стріча. В четвер, 24. листопада/новембра, од 19.00 год. Шымон Моджеєвскій буде оповідал про парудесят років свойой роботы для ратуваня перед загыбніньом веце як 3000 крестів, нагробных памятників і капличок з обшыри, на котрых жыли Лемкы, Бойкы, але і Жыды, Полякы, Ромове і Німці. Шымон Моджеєвскій оповіст о першых кроках в рамках акциі «Опис» і «Надсаня», о декаді діяня Неформальной Ґрупы Камінярів «Маґурич» і основаным в 2007 р. Стоваришыню «Маґурич». Як пояснят лідер орґанізациі, ідею было все ратувати, інвентаризувати і документувати сепульклярну штуку, кресты, капличкы, што остают без опікы, а факт, што будут захованы як елемент сучасного краєвиду влият на сучасне постеріганя реґіону як місця, в котрым іщы не так давно спілістнували ріжны культуры. Покликаный до жытя Шымоном Моджеєвскым Маґурич найчастійше занимат ся забытыма, оставленыма без опікунів цмонтерями в неістнуючых селах. Награна бесіда буде пак доступна на портали karpaccy.pl.

З Кракова до Нового Санча в годину?

Єст можливіст, што до пятьох років західня част Лемковины буде іщы ліпше получена з Краковом. Представникы Парляментарного Ансамблю дс. Комунікацийных Розвязань в Малопольщы подают 2027 рік як термін одданя желізницьовой лениі Подленже-Пєкєлко. Вымогом сут м.ін. грошы з Державного Пляну Одбуводы. Згідні з заложынями потяг з Кракова до Нового Санча буде ішол лем годину, а до Закопаного – 100 минут. В рамках той інвестициі мают положыти 58 км новой желізниці і змодернізувати лению но 104 Новый Санч-Хабівка. Кєд вшытко ся поведе, так як плянуют, од 2027 рока буде мож скором желізницьом подорожувати з Нового Санча до Кракова, Варшавы і інчых міст.

Ремонты перед Европейскыма Іграми

Крениця рыхтує ся до ІІІ Европейскых Ігр, котрых головным орґанізатором єст Краків. В курорті спортовці будут ся змагати в рамках штырьох спортовых конкуренций. Місто на орґанізацию змагань достало фінансову підпору на ремонт і будову новых обєктів. Пару конкуренций пройде під дахом Ледовой Галі та на Парковій Горі. Спортовы змаганя пройдут в 24 дисциплинах і потырвают од 21. червця/юнія до 2. липця/юлия 2023 р. Репрезентанты 50 держав, м.ін. змагаючы ся в джудо, карате ци тайскым боксі, появлят ся в Креници. Тырват комплексовый ремонт – выміняют систем вентиляциі, протиогньовый систем, буде новый дах, фотовольтаіка і телеекраны. Хоц ремонт зачал ся пізнійше, як принимали, то думают, што встигнут. Західні убочы Парковой Горы будут місцьом змагань циклистів MTB – то дисциплина гіской циклистикы, де циклисты змагают ся на долгій і тяжкій трасі.