Сумар дня на 23. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 23. листопада/новембра 2021 р.

Трансграничный проєкт для промоциі дідовизны Низкого Бескіду

Бобова і Санкова та Стропків і Нижня Полянка на Словациі отримали унійне дофінансуваня на реализацию спільных ініциятив маючых зміцнити трансграничну спілпрацу в обшыри культурно-природничой дідовизны. Проєкт буде зреализуваный до квітня/апріля 2023 р. Його цілковитый кошт то близко 2,2 млн евро, з чого 85% покрыє дотация з Европейского Фонду Реґіонального Розвитку. Лідером проєкту єст ґміна Бобова. В рамках проєкту в Бобовій возникне рекреацийно-культурный комплекс з амфітеатром і роверовом стежком, будут вызначены і ознакуваны новы ґмінны біциґльовы трасы. В Санковій побудувана буде спацерова стежка, яка получыт два деревяны обєкты UNESCO на обшыри ґміны – костел св. Филипа і Якова в Санковій і грекокатолицку церков Покровы Пресвятой Богородиці в Рыхвалді. Створеный буде і природничо-едукацийный парк з ґратьом до сенсоричных досвідчынь в Сярах. Словацка сторона заплянувала м.ін. ревітализацию парку в Нижій Полянці, будову макєты деревяной забытковой святыні ци однову Ювілейного Парку в Стропкові. Заплянувано тіж спільны діяня для промоциі і утырваляня культуровой і природничой дідовизны Низкого Бескіду по обох сторонах границі. Буде зорґанізуваный Фестіваль Культуры Погранича в Бобовій і Стропкові, возникнут мапы, авдийопровідник і аплікация для туристів та польско-словацка ґазета в електоронічній і традицийній версиях. Діти з обох стран границі возмут участ в інтеґрацийных варштатах в Санковій.

Авдийопровідник по русиньскы

Про одвиджаючых крипты в селі Осадне на Словациі был змодернізуваный авдийопровідник. Окрем словацкого, росийского, анґлицкого, німецкого і польского, мож тепер выслухати інформациі тіж по мадярскы і по русиньскы. Проєкт был підпореный з розрахунку Пряшівского Самосправного Краю. Крипта находит ся під православным храмом Вознесіня Господнього і є єдином того типу на Словациі. Сут в ній остаткы павшых вояків з І світовой войны росийской і австро-угорской арміі.

Парлямент Молодых принял резолюцию о Шлезскым Реґіоні

Шлезска Реґіональна Партия поінформувала на своім фейсбуковым профіли, што в суботу, 20. листопада/новембра, Парлямент Молодых Польской Республикы принял резолюцию о Шлезскым Реґіоні, в котрій заликал до вызнаня Шлезаків етнічном меншыном, підпорил наданя шлезскому статусу языка етнічной меншыны і внюс о введіня до шкіл реґіональной едукациі. Як пише на своім фейсбуковым сайті Шлезска Реґіональна Партия, єст то для них причына до радости і надія на тото, же разом з поколіньовом выміном посланців до польского Парляменту поведе ся зреализувати тоты постуляты. Тепер сподівают ся, же резолюция Парляменту Молодых буде зіґнорувана або одшмарена.

Тырвают працы при Загородах Сил Натуры в Креници

Як поінформувал бургомайстер Крениці Пьотр Рыба, працы при креницкых Загородах Сил Натуры ідут ґу кінцьови. Протягом двох тыжнів явит ся освітліня, укріплят спацеровы алейкы, зроблят паркінґы і асфальтову верству. Ґратя вказуюче права фізикы єст уж по части замонтуване, практично скінченый єст і видоковый тарас. Готовы сут тіж ґранітовы постументы, на якых будут стояти бронзовы мініятуры найкрасшых креницкых будинків. Од яри будучого рока атракция має быти одкрыта для одвиджаючых.