Сумар дня на 23. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 23. квітня/апріля 2025 р.

Мариянка Пласконь з Ліґниці – таляновыта гушлярка

Ліґничанка Мариянка Пласконь, учениця Ансамблю Музичных Шкіл в Ліґници успішні выступила в VIII Медженародным Конкурсі Гушель і Альтівок „VIVALDI 347”, якій одбыл ся в Вєлічці. Учениця ІІ клясы Основной Музичной Школы І ступени здобыла ІV нагороду, ривализуючы з музиками з вельох держав. Жырі конкурсу доцінило не лем техніку молодой гушляркы, але тіж єй музичну вражливіст і сценічну дозріліст. Мариянка Пласконь свій талант розвиват під опіком Алициі Драґан, учытелькы гушель. На сцені акомпаніювал ій на фортепіані Віктор Шымайда.

Прелекция з др. Богданом Горбальом

В віторок 29. квітня/апріля одбуде ся онляйнова стріча з др. Богданом Горбальом, якій оповіст о лемківскых бізнесменах в Америці. Др Богдан Горбаль то історик і бібліотекар, куратор славяньской і східньоевропейскых колекций в Ню Йоркскій Публичній Бібліотеці. Єст автором веце як стох дописів і шестьох книжок, векшіст його робіт зосереджат ся на лемківскых темах. В остатнім часі написал книжку пн. From Thatched-Roof Houses to Immigrant Entrepreneurship: First Generation Lemko-American Businessmen, котрой наголовок мож перевести як: Од хыж крытых стіхом до підприємства іміґранітв: лемківско-американьскы підприємці першой ґенерациі. Др Горбаль представлят в ней тему лемківскых еміґрантів до Америкы, якы зачали приізджати гын кінцьом ХІХ ст. Першым іх занятьом была найчастійше тяжка і небезпечна робота в майнах. Некотрым повело ся основати своі фірмы. Книжка і онляйнова прелекция становлят перегляд лемківской оперативности. Стріча з др. Гобральом одбуде ся через плятформу ZOOM 29. квітня/апріля о 19 годині за східньоамериканьскым часом.

«Зберачы кости» в Ждыни

Уж в найблизшу неділю 27. квітня/апріля одбуде ся першый показ новой театральной штукы театральной ґрупы Племя з Устя Руского. «Зберачы кости» то спектакль написаный Малґожатом Пілаціньском. То оповіст, котра закорінена єст в локальній істориі. Маме 1947 рік, молода жена мусит лишыти свою хыжу. Ден пізнійше інча жена занимат єй місце. Днес акторка Моніка Бабуля і музик Мирко Боґонь стрічают ся по роках, жебы разом оповісти історию, котра іх заєдно лучыт і ділит. Спектакль ставлят звіданя «Ци мам право гев жыти» – задаване потомками выселеных і осадників. Героі штукы зберают метафоричны кости, «бо вірят, жеаж товды, коли поховают стару історию, нова буде ся могла зробити». Спектакль вырежысерувал Мариюш Лясковскій, музику написал Мирко Боґонь. Черговый показ одбуде ся 1. мая, а 2. і 3. мая ґрупа Племя вкаже спектакль пн. Бомбель/Нагач.

Авторскы стрічы з проф. Елейн Русинко про книжку «Мама Енді Варголя»

Недавно на выдавничым рынку вказала ся анґлоязычна книжка авторства проф. Елейн Русинко пн. «Мама Енді Варголя». Авторка, експлоруючы непубликуваный скорше материял, в тым русиньскоязычны кореспонденцию і фільмы, вказує незнаный дотепер образ мамы Варголя – Юлиі. Оповідат о єй тяжкым жытю, вказує єй творчы здібности і темпераментну особовіст. Елейн Русинко слідит жытя Юлиі од зеленых гір в Старым Краю, через занечыщеный, індустрияльный Пітсбурґ і аванґардовый Ню Йорк. Русинко в книжці бадат влияня русиньской культуры, грекокатолицкой віры і традицийного і консервативного світопогляду Юлиі на ультрамодерного сына, представника квінтесенциі американьского артисты. Авторскы стрічы з Елейн Русинко одбудут ся в Ню Йорку і Пітсбурґу, одповідньо 25. квітня/апріля і 16. мая. Книжку мож замовити через сайт Карпаторусинського Общества.