Сумар дня на 23. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 23. квітня/апріля 2020 р.

Акция #підтрумуємелокальных

Місто Ґорлиці заохочат взяти участ в новій ініциятиві, котра має за ціль підтримувати локальных підприємців і локальный бізнес. Акция є з назвом #підтримуємелокальных (#wspieramylokalnych). Власти міста закликуют, жебы купувати продукты в ґорлицкых підприємців. Акция має помочы перейти через нелегкій час пандеміі коронавіруса, што влият барз міцно на локальный бізнес. Місто пропонує, жебы мудро выберати місця, де будеме купувати своі продукты. В забаві, котра має іти на хосен бізнесу, іде о тото, жебы зробити закупы в єдным з локальных склепів, кєд тото можливе, жебы купити заєдно локальны продукты. Можна і зрезиґнувати з варіня і замовити стравы в єдній з ґорлицкых реставраций. Дальше треба зробити знимкы своіх закупів, іджыня ітд. і дати іх до социяльных медий і означыти до того самого дальшых пят осіб. Місто Ґорлиці на своім фейсбуковым фанпейджы зачало забаву і вызвало до челенжду дальшых люди, в тым бургомайстра Ґорлиц, Рафала Куклу. Заохочаме і мы.

Закінчыла ся збірка горшы на поміч ґорлицкому шпытальови

На сайті www.zrzutka.pl тыват в тым часі вельо збірок, жебы помочы медикам в борбі з коронавірсом. Така збірка была оголошена тіж для підпоры ґорлицкых медиків. Закінчыла ся успіхом. Цілю збіркы было зобрати фінансы, жебы купити предметы особистой охороны для дохторів, медсестер, аркушерок, парамедиків і інчых робітників Шпыталя імени Генрика Климонтовича в Ґорлицях. Грошы будут переданы для ґруп, котры зосереджают особы, якы выконуют медичны професиі, а якы самособом діют на обшыри ґорлицкого шпыталя. В міру збераных грошів, купуваня і передаваня предметів особистой охороны проходило набіжучо. Зобрано більшіст, бо 45.650 зл, з заложеной скорше квоты 50.000 зл. Придбаны будут охоронны маскы, комбінезоны ци фільтры до масок.

Істория уменя в Выгорлятскым Музею

Новый музейный проєкт під назвом Істория уменя то част онляйн выставы Выгорлятского Музею в періоді, коли музей, подібно як і дальшы культурны інституциі з причыны ограничыня пошырюваня хвороты COVID-19 є для одвиджаючых запертый. Выстава є направлена на старшу молодіж, студентів і дорослых з інтересом о познаваня реґіональной істориі і культурне діяня в своім оточыню. Історию уменя Выгорлятскій Музей в Гуменным отворил символично вчас Світового Дня Уменя, котрый святкує ся 15. квітня/апріля. В тот ден народил ся італияньскій умелец Леонардо да Вінчі. Цільом є вказати уменя в шыршых соспільных повязанях, приближыти в музейных експозициях, в выставовых просторах музею, в комнатах каштелю і в цілым просторі реґіону Вышнього Земплина, і дати своім любителям простір на студиюм, досліджыня, себепрезентацию і одпочынок. Музей выбрал творы і авторів з цінной образовой і умелецкой збіркы свого умелецко-історичного фонду од ХVII по ХХ ст. На фоні історичных дій приближує, чым были умелецкы творы для іх авторів і маітелів, хто были іх музы, як і чом выникли, з якым посольством ся до люди пригваряют і што вшытко ся з них днешній чловек може дознати. Цілый новый проєкт мож найти на інтернетовій страні Выгорлятского Музею в Гуменным.

Гуменне боронит ся перед наслідствами пандеміі

Місто Гуменне выголосит фінансову збірку на забезпечыня наслідств пандеміі коронавіруса. В пятницю, 17. квітня/апріля, на засіданю містецкого заступительства о тым вырішыли єдноголосно посланці. Пропозицийом на выголошыня збіркы реаґувал радный Іван Гопта на ініциятиву Мартина Рущаньского. Тот колеґів вызвал, жебы в рамках солідарности з жытелями, котры придут за роботом і грошами, зрекли ся половины своіх нагороджынь за місяці май, червец/юній, липец/юлий і серпен/авґуст. Пропозиция тота остала без реакций, але збірка перешла. Того, на што підут грошы, посланці не рішыли. Єднак є звіданя, хто буде о поділі містецкых фінансів рішал.