Сумар дня на 23. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 23. грудня/децембра 2024 р.

Професор Михаіл Капраль нагородженый Нацийональном Премійом 2024

В четвер 18. грудня/децембра на Мадярах припомянули собі Ден Нацийональных Меншын. Як підкрислила підпредсідателька Парляменту Мадяр Дора Дуров, 18. грудня/децембра 1992 р. была принята Деклярация зъєднаных народів о правах нацийональных або етнічных, реліґійных і языковых меншын. Основном цілю того документу є хоронити достоменніст нацийональных меншын. Разом на Мадярах єст вызнаных 13 нацийональных меншын, в тым Русины. При нагоді свята в Будапешті одбыло ся передаваня Нацийональных Премій за 2024 р., котрыма нагороджуют особности спосеред нацийональных меншын. Того рока было нагородженых 12 осіб і єдна орґанізация. Медже оціненыма є і професор Михаіл Капраль – русиньскій лінґвіста, головный кодифікатор русиньского языка на Мадярах, котрый перевзял нагороду за Русиньскій Науковый Інститут ім. Антония Годинкы. Веце про професора Михаіла Капраля прочытате в дописі на нашым портали.

О. Павел Стефановскій нагородженый Крестом Заслугы

В четвер 19. грудня/децембра лемківскій священник о. Павел Стефановскій был нагородженый Бронзовым Крестом Заслугы. Одзначыня было надане Президентом Польской Республикы за заслугы в діяльности для осіб потрібуючых помочы і спертя, загороженых социяльным выключыньом. Переданя Креста Заслугы одбыло ся при нагоді парохіяльного свята в православній церкви св. Миколая в Щеціні, де о. митр. Павел Стефановскій служыт як парох. Святочны богослужыня очелил архієпископ вроцлавскій і щеціньскій Юрий. По Літургіі одзначыня вручыл о. Павлови Стефановскому Західньопоморскій Воєвода Адам Рудавскій. Присутны были і Посол на Сойм Ярослав Жепа, член Соймовой Комісиі Нацийональных і Етнічных Меншын, Президент Міста Щецін Пьотр Кжыстек, Полномічна західньопоморского Воєводы дс. нацийональных і етнічных меншын Нелі Копаньска, і дальшы представникы локальных власти, служб, римокатолицкого костела і академіцкого середовиска.

Выголошены результаты Літературного конкурсу Мариі Мальцовской

В пятницю 20. грудня/децембра в просторах Consilium maius Ректорату Пряшівского Університету одбыло ся выголошыня результатів 11. річника Літературного конкурсу Мариі Мальцовской. В конкурсі, котрый што рік орґанізує Сполок русиньскых писателів Словациі, оціняны сут творы дотля іщы не публикуваны. Того рока своі тексты загнало семox авторів, в тым троє то дебютанты. Треті місця заняли Анна Замутовска і Мария Шмайдова, другє місце Людмила Шандальова, а перше Леа Васькова. Дрібниці чытайте на нашым портали.

Христос ся Раждає!

А на конец днешніх новин хочеме передати святочны желаня вшыткым тепер празднуючым. За григорияньскым календарьом заран выпадат ден велиі Рождества Христового, святкуваного окрем християн західньой традициі і вірныма дакотрых східніх Церкви, котры ідут за новым стильом. Зато вшыткым слухачам, любителям радия, котры святкуют Різдво уж тепер, желаме вшыткого доброго і смачной велиі при родинным столі. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях. Христос ся Раждає!

Джерело фотоґрафіі: Zachodniopomorski Urząd Wojewódzki