Сумар дня на 22. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 22. жолтня/октобра 2021 р.

Дальшы можливы подвійны названя

В середу, 20. жолтня/октобра, депутаты Нацийональной Рады Словацкой Республикы схвалили новелизацию закону о хоснуваню языків нацийональных меншын. Завдякы тій новелизациі можливе буде хоснувати в селах і містах інформацийны дороговы знакы з назвом вызначеных ціли в державным, словацкым языку і в языку нацийональной меншыны. Дотепер в языку нацийональной меншыны писаны были назвы села або міста на знаках, котры значыли іх початок або конец, на будовах орґанів публичной адміністрациі, на публичных будовах, желізницьовых стациях, як і на дальшых выбраных місцях. Новелизация закону розшырит двоязычніст Словациі о дальшы знакы. Нова леґіслятива має обовязувати од 1. січня/януара 2022 рока.

Другій памятник Никыфора в Креници

Никыфор має в Креници другій памятник. Представлят він Никыфора тримаючого в руках своі рисункы, якому товаришыт пес. Новый памятник поставленый єст при улици Крашевского, близко грекокатолицкой церкви свв. Петра і Павла в Креници. Іщы єден памятник вызначного лемківского артисты находит ся при вході на креницкій дептак. При новым памятнику была одкрыта специяльна ґалерия на мурі, посвячена творчости Епифана Дровняка. Складают ся на ню репродукциі його выбраных прац.

Velo Dunajec найліпшым туристичным продуктом?

Як поінформувала на своім фейсбуковым сайті Малопольска Туристична Орґанізация (МТО), Velo Dunajec як малопольскій кандидат має шансу на Цертифікат Інтернавтів 2021 в конкурсі Польской Туристичной Орґанізациі на найліпшый туристичный продукт. Роверова траса Velo Dunajec чыслит близко 250 км і лучыт пілніч і полудне малопольского воєвідства. Веде теренами долины Дунайця з видоками на Татры, Ґорцы, Бескіды, Пєніны і Погіря. Траса была зголошена до реґіонального етапу конкурсу Малопольскым Воєвідством, а о зголошыю до загальнопольского етапу рішыл Заряд МТО. Голосувати на Velo Dunajec мож іщы до 3. листопада/новембра на офіцийным інтернетовым сайті Польской Туристичной Орґанізациі.

Лемковина на шклі малювана

Центр Туристичного і Культурового Продукту Безкіду просит на нову выставу в Ґалериі Стара Реміза в Высовій. Обзерати мож на ній образы на шклі авторства Монікы Теслюк. Працы інспіруваны народном штуком были намалюваны олійном техніком лученом з тушом. Моніка Теслюк жыє наштоден в Бєльску-Бялій, а од понад двадцетьох років єст звязана з Низкым Безкідом, зо селом Новиця. Вельо років працувала в інституциі культуры, яка занимат ся фольклором і народном штуком. Вела там м.ін. варштаты з малярства на шклі. Як бесідує сама авторка, вельо інспіраций бере з натуры, з ліса ци новицкой лукы, яка часто єст головным елементом або фоном єй образів. Шыбы, на котрых малює, трактує як «выгляды», через котры позерат на світ. Выставу прац Монікы Теслюк буде мож обзерати в Центрі до 10. грудня/децембра того рока.

#BieszczadyPamietaja

Тырват соспільна акция «Бєщады Памятают». Єй цілю єст вратувати перед забытьом села, што ся находят ся на обшыри Бєщадів, в котрых мешкали і Лемкы, а якы по акциі «Вісла» лишыли ся порожні. Бесіда гев м.ін. о Беньовій, Тисковій ци Лопянці. Окрем диків садів, по давных жытелях лишыли ся цмонтері, церквиска ци придорожны кресты. Орґанізаторы акциі заохочают туристів і жытелів Бєщадів опікувати ся выміненыма місцями, головні порядкуючы іх. Пропонуют тіж, жебы поділити ся своіма діянями, публикуючы в социяльных медиях знимкы з гаштаґом #BieszczadyPamietaja.