Сумар дня на 21. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 22. жолтня/октобра 2021 р.

Перша премєра ТАД в тым сезоні

Першом премєром драматичного колективу Театру Александра Духновича в Пряшові в сезоні 2021/2022 буде інсценізация роману «12 стільців» од Ілиі Ільфа і Євгенія Петрова. Премєра одбуде ся в суботу, 23. жолтня/октобра. Драматизацию роману про театр зробила Терезия Міндошова, режысерию приготовил Антон Коренчі. На сцені вкажут ся вшыткы члены драматичного колективу. Автором сцены і костюмів є Ярослав Даубрава, музику компонувал Владимір Шаришскій, хореоґрафію робил Андрий Суханов. Директор театру Мариян Марко інформувал, же в тым сезоні будут штырі премєры, при чым в тым календарным році буде іщы єдна. Признал, же ограничыня спричынены пандемійом сут проблемом, но є радый, же по одкрытю театру публика зас вернула ся до театру, і єднако так є то і на селах пілнічно-східньой Словациі, де театр часто ходит выступувати медже Русинів.

В Рускым Керестурі спомнули бывшых владыків

В віторок, 19. жолтня/октобра, была одслужена в Катедральным Соборі св. о. Николая в Рускым Керестурі літургія і панихіда з нагоды 40. річниці смерти апостольского адмінітратора крижевацкой єпархіі і архієпископа митрополиты бельградского Гавриіла Букатка. Головным служытельом был керестурскій єпарха кыр Ґеорґій Джуджар, з котрым служыли дальшы священникы. Владыка Ґеорґій при тій нагоді припомянул жытя, діяльніст і смерт єпископа Букатка. Владыка вєдно з вірныма молили ся і за дальшых штырьох усопшых єпископів – Діонісия Няраді, Йоакыма Сеґеді, Йоакыма Гербута і Славомира Мікловша. Вшыткы штрырі єпископы сут похоронены в крипті, котра находит ся під катедральным собором в Рускым Керестурі. Гавриіл Букатко был Русином. Владыка много зробил про укріпліня грекокатолицкой Церкви в Югославіі. Вмер 19. жолтня/октобра 1981 р. в Вербасі.

В Ґладышові будуют церков

Перед парома днями на пляци будовы православной церкви в Ґладышові (ґорлицкій пов.) были зроблены дальшы роботы. Тым самым видно поступы в будові нового храму. Роботы дотуляли ся закінчыня етапу звязаного з фундаментами. Тоты были засыпаны, а земля утверджена і заляна циментом. При будові новой церкви перше і найбільше роблят самы парохіяне. Вірны дякуют і ґладышівскій Охотничій Протиогньовій Стражы. Будова зачала ся в листопаді/новембрі 2020 р. В першым етапі, якій довершеный был кінцьом минулого рока, вірным повело ся выляти фундаменты. Актуальны роботы то уж дальшый етап, якій завершыл працы повязаны зо зрыхтуваньом основы під поставліня конструкциі деревяного храму. Деревяна церков, яка стане в середині села, буде репликом неістнуючой уж церкви свв. Космы і Даміана з Незнайовы. Будову святыні мож фінансово підпорити вплачаючы жервы безпосередньо на банковый рахунок Парохіі або на страні колекты в сервісі zrzutka.pl.

Лавреаты оцініня ПСК

Крайскы депутаты Пряшівского Самосправного Краю схвалили на своім понедільковым онляйновым засіданю трьох лавреатів на оцініня Пряшівского Самосправного Краю. Єдным з нагородженых буде протосинкель Пряшівской Грекокатолицкой Архієпархіі о. Любомир Петрик. Оцінены были выбраны спомедже 18 пропозиций. Святочне передаваня оцінінь одбуде ся 14. грудня/децембра вєдно за рік 2021 і 2020, кєд же минулый рік не могло одбыти ся передаваня. Любомир Петрик нaгорoду отримат за координацию приготовлінь і самой візиты папы римского Франциска до Пряшова. Священник был головным координатором той подіі. Спілпрацу на такій подіі мал уж в 1995 р., коли на Словацию пришол Йоан Павел ІІ.