Сумар дня на 22. січня/януара 2025 р.

Приносиме вам сумар медияльной ґрупы ЛЕМ.фм+ на ден 22. січня/януара 2025 р.

Лемківскы малювянкы!

Стоваришыня «Руска Бурса» в Ґорлицях приходит з новом выдавничом серийом – «Малюванкы для діти». Першы дві части уж напечатаны – сут то части Осін і Зима, а в плянах на тот рік сут іщы: Яр і Літо. Серия «Малюванкы для діти» то зошыты напечатаны з думком о наймолодшых дітях. То гейбы просты книжочкы до кольоруваня, але были так запроєктуваны, жебы полнити ролю споіня медже забавом а науком. Лучат в собі языковы, культуровы і артистичны елементы. В каждій части малюванок поміщено фраґменты до кольоруваня і дополняня, але тіж просты вершыкы, римуванкы, співанкы і слова в лемківскым языку. Рисункы представляют характеристичны для лемківской культуры елементы: деревяну хыжу, церков, народне облечыня ци типовы для реґіону краєвиды. Завдякы тому діти можут не лем розвивати мануальны здібности і креативніст, але тіж познавати своі корені і будувати достоменніст. За мериторичный зміст малюванок одповідат Варвара Дуць, учытелька лемківского языка з вельолітнім досвідчыньом, авторка інчой неоціненой публикациі до вчыня – «Робочого зошыту до лемківского языка». Вшыткы рисункы запроєктувала ґрафічка і архітектка Домна Цєпляк, яка так само одповідат за цілый ґрафічный і типолоґічный проєкт. Малюванкы было за дармо розданы учытелькам лемківского языка в предшколях та клясах 1-3.

В Соймі будут святкувати 20. річницю уставы о нацийональных і етнічных меншынах та о реґіональным языку

О два тыжні в польскым соймі одбудут ся конференция і одкрытя принагідной выставы з нагоды 20. річниці уставы о нацийональных і етнічных меншынах та о реґіональным языку. Подію одкрыют Маршалок Сойму Шымон Головня, посланкыня Ванда Новіцка – Ведуча Комісиі Нацийональных і Етнічных Меншын та Томаш Сємоняк – Міністер Внутрішніх Справ і Адміністрациі. Конференция складала ся буде з трьох дискусийных панелів. Першый тыкал буде істориі і значыня соймовой меншыновой комисиі, другій буде посвяченый функцийонуваню уставы, зас третій буде ся односил до новелизациі уставы – дотеперішніх проб і пропозиций на будуче. Прелеґентами будут послы і посланкыні, представникы меншын, експерты і міністерияльны урядникы. Модераторами будут: Ришард Ґалля, порадник Маршалка Сойму дс. меншын, проф. др габ. Ґжеґож Лодзіньскій, др габ. Ева Міхна, проф. ЯУ та др габ. Томаш Віхеркєвич, проф. Університету А. Міцкєвича в Познані. Принагідна выстава презентувала буде вшыткы вымінены в уставі меншыны з іх коротком характеристиком.

Дофінансуваня Руской Бурсы на 2025 рік

Міністер Внутрішніх Справ і Адміністрациі затвердил поділ дотаций на задачы реализуваны в 2025 році. Стоваришыня «Руска Бурса» в Ґорлицях отримало дофінансуваня на діяльніст радия і порталю ЛЕМ.фм, печатаня чергового номеру наукового часопису «Річник Руской Бурсы», двох дальшых части малюванок для діти та на ведіня Терочкы. Помимо зложыня оферты на реализацию цикличных подій в Бурсі – як напр. перегляду колядничых ґруп для діти і молодежы, закінчыня шкільного рока для учеників лемківского языка, циклю варштатів, выкладів, діяльніст бібліотекы – внесок, котрый тото обнимат – ведіня Осередка Культуры – на тот момент не отримал дофінансуваня. Кєд буде затверджене звекшыня буджету на 2025 рік на реализацию задач, котрых цілю є охорона, захованя і розвиток культурной достоменности меншын, то внесок тот буде дофінансуваный і буде міг быти реализуваный. Підпертя своіх діянь отримали тіж м.ін. Єпархіяльный Осередок Православной Культуры Ельпіс, Товариство для Розвитку Музею Лемківской Культуры, Лемківскій Ансамбль Пісні і Танця «Кычера», Стоваришыня Лемків ци Стоваришыня Промоциі Лемківской Творчости «Серенча».