Сумар дня на 22. мая 2024 р.

Приносиме вам сумар медияльной ґрупы ЛЕМ.фм+ на ден 22. мая 2024 р.

Де сут іщы хыжы прикрашены крапками?

Од початку текучого рока рушыл проєкт пн. «Крапкы і крискы. Популяризуваня знаня о декоруваню стін в деревяным реґіональным будівництві». Його орґанізатором є Головный Заряд Людознавчого Товариства, а дофінансуваный єст зо середків Міністерства Народовой Едукациі. Ідею проєкту є найти істнуючу забудову з мотивами малюваных на стінах крапках, зінвентаризувати тоты місця, а вєдно з музейном квередном – пояснити етимолоґію і значыня тых прикрашынь. Крапкуваня і малюваня інчых прінтів популярне было на західній Лемковині і серед Сандецкых Ляхів, одтале заклик до вас – кєд мате дакы архівальны знимкы, або знате, де были, або де іщы сут захованы хыжы, шпіхліры ци інчы будинкы прикрашены того рода здоблінями – сконтактуйте ся з нашом редакцийом – radio@lem.fm. О контакт прошены сут тіж особы, котры мают знаня в обшыри такого способу прикрашаня лемківскых загорід – будеме вас контактувати безпосередньо з координаторком проєкту.

Выбераня шолтысів

Неодолга пройдут выборы на шолтысів 15 шолтыств ґміны Польковиці. Першы выборы пройдут кінцьом мая, дальшы в наступных червцьовых днях. Послідні выберати шолтыса будут мешканці Желізного Моста і Пішковиц, выборы на тоты функциі одбудут ся 17. червця/юнія. Жытелі сел польковицкой ґміны будут выберати не лем шолтысів, але і членів шолтышскых рад. Тото, што діє ся в шолтыстві, на што выдаваны сут грошы, якы мают быти інвестициі, што єст важне для села – о тым рішат ухвалами сельскє зобраня згідне з вольом мешканців. Шолтыс єст представником выконавчого орґану при підпертю рады. Гармоноґрам выборів та зряджыня бургомайстра Польковиц сут доступны на інтернетовым сайті Бюлетину Публичной Інфромациі. Додатковы інформациі мож тіж найти на оголошыньовых таблицях в каждым зо сел.

Лемкіскє Лісто 2024 в Чмели

За неполный місяц в Чмелю пройде чергова едиция імпрезы під назвом «Лемківскє Літо». Проґрам обнимат выступы ансамлбів, рецитаторскы і вокально-танцювальны выступы діти і молодежы, плястичный конкурс, а тіж спортовы гры і забавы з нагородами. В пляні є і орґанізация футбольового волейбольового мечів. Выступлят ґрупы н’лем folk, Файна Ферайна, ансамблі Ластівочка, Розтока і Ехо. Будут огниско, реґіональны стравы і ярмачны просторы. Орґанізатором подіі є Православна Парохія св. Тройці в Любіні.

Конференция духовеньства православной перемышльско-ґорлицкой єпархіі

18. мая в Команчы проходила дорічна конференция духовеньства перемышльско-ґорлицкой єпархіі під проводом архієпископа Паісия. Проґрам конференциі зачал ся од Божеской Літургіі, вчас котрой владыка нагородил признаныма Собором Єпископів Польской Автокефальной Православной Церкви пасхальныма нагородами. Право ношыня другого наперсного креста отримал о. митр. Василь Заброцкій з Кальникова і о. митр. Вєчеслав Янєль з Клоковиц, право ношыня митры отримал о. прот. Юрий Мокрауз з Перемышля. Вчас конференциі реферуване было жытя єпархіі і поєдных деканатів, справопис з катехетичной діяльности ци Єпархіяльного Осередка Православной Культуры «Елпіс» в Ґорлицях, Єпархіяльного Осередка Милосердя «Елеос» в Ґладышові та діяльніст єпархіяльного координатора до справ помочы Украіні, в тым діяльности Єпархіяльного Дому Дітины. Принятый был проґрам єпархіяльных празднувань 100. річниці автокефалиі Православной Церкви в Польщы. Бесіда была тіж о празднуваню 110. річниці мученичой смерти священномученика Максима Сандовича і основаня лаґру в Талергофі. Серед омовленых справ явила ся тема ремонту памятниковых церкви на обшыри єпархіі, а тіж будовы церкви в Ґладышові і на св. Горі Явір.