Сумар дня на 22. мая 2023 р.

Приносиме вам сумар медияльной ґрупы ЛЕМ.фм+ на ден 22. мая 2023 р.

Юрий Новосількій выріжненый нагородом «Divinis et humanis»

Вызначный артиста лемківского походжыня Юрий Новосільскій (посмертно) і віртуоз фортепіану Лешек Можджер отримали нагороду «Divinis et humanis», признавану Фундацийом Академія Яна Любраньского в Познані. Премія єст признавана за выдатны осягніня в обшыри культуры, штукы, наукы, социяльных та гуманістичных і реліґійных справ, за знаня, фантазию, поставу, котра перекрачат, што звычайне, очывидне і загально приняте. Лавреатами сут люде, котры выпередили і перевысшыли своі часы. Юрий Новосільскій – артиста, педаґоґ, теоретик і критик штукы, філософ і православный теолоґ, єст узнаваный за єдного з найвызначнійшых сучасных малярів і іконописців. Нагороды были вручены вчера, 21. мая, підчас Свята Академіі Любраньского. Лявдацию в чест Новосільского выголосил знаный православный теолоґ і дипломата Михал Клінґер. Як мож чытати в поясніню Капітулы Нагороды, Новосільскому медаль признали м.ін з причыны того, же в часах коли культура неохочо звідує о сенс жытя і смерти, а ідеализує неглубокы ексцентризми, його малярство і мысли можут ся вказати спасительныма.

Спілпраца з Greenhealth для розвитку екотуризму в Полонинах

Пряшівскій Самосправный Край стал єсным з партнерів проєкту Greenhealth. Спілпраца буде тыкала Нацийонального Парку Полонины і Астрономічной Обсерваториі в Колоници. Цілю проєкту Greenhealth єст удоступнити місця реґіону і выбудувати з них туристично атракцийне оточыня, з акцентом на охорону природы. В Полонинах злучыт ся то з уж веденыма і плянуваныма активностями заміряныма на утримательный розвиток і екотуризм. ПСК посередництвом проєкту підпорит Парк при дізайні і творіню новых продуктів туристичного руху. Активности проєкту Greenhealth конкретно заміряют ся на продукты такы як nordic walking, біциґльовы стежкы, лісовы купелі ци лісовы терапіі. Пряшівскій край єст єдным з семох партнерів проєкту Greenhealth, дальшы сут з Іспаніі, Хорвациі, Швециі, Польщы, Ірляндиі і Німец. Більше чытайте в дописі на нашым портали.

Залив Климківка на великым екрані в Канн 

Залив Климківка мож было в минулу пятницю 19. мая видіти на великым екрані в Канн (Cannes), в фільмі «The Zone of Interest» (Зона інтересів) в режысериі Джона Ґлейзера. Світова премєра продукциі, яка была знимана м.ім. в Низкым Вескіді, была вказувана підчас Фільмового Фестівалю Cannes 2023. Фільм был номінуваный до головной нагороды, Золотой Пальмы, єдной з найважнійшых фільмовых нагорід. «Зона інтересів» то оповіданя о штоденным жытю німецкой родины прожываючой в часі войны коло лаґру Аушвіц. Єдночасно вказує історию польской родины, яка помагала вязненым в лаґрі. Фоном для драмы сут околиці Ґорлиц, а кадр з над заливу Климківка єст єдном з головных, окладинковых знимок продукциі.

Русиньскій Фестіваль во Свиднику

Днес початок 11. едициі Русиньского Фестівалю во Свиднику. Буде він тырвал до 28. мая. То найбільша русиньска пленерова подія во світі, на якій презентувана є автентична русиньска культура, а при тым і єй модерны виды. Каждого дня аж до пятниці будут проходити товаришучы подіі. В вікенд в свидницкым амфітеатрі будут концерты нашых русиньскых ансамблів і запрошеных сусідніх колективів, а на каждый вечер рыхтувана єст забава при музиці домашніх гудаків.