Сумар дня на 22. марця 2022 р.

Приносиме вам сумар медияльной ґрупы ЛЕМ.фм+ на ден 22. марця 2022 р.

Не лем Ґорлиці плянуют музей І світовой войны

Ідея музею І світовой войны явила ся тіж в Перемышли. Хоцкі в обох містах закля што музей єст лем несмілом думком, то Перемышль пішол о крок дальше і має уж вступный плян, як такій музей міг бы выглядати. В остатніх днях на Підкарпатю вказали ся результаты конкурсу «Взорове Підкарпатя 2021», де серед зголошеных прац была пропозиция адаптациі єдного з перемышльскых будинків на потребы музею І світовой войны. Автором єст Лукаш Дудзік, студент Державной Высшой Східньоевропейской Школы в Перемышли, а сама концепция возникла в рамках ліценциятской працы. Як пояснят автор, в пляні музей поділеный єст на штырі части. Стежка одвиджаня веде од ґенезы воєнных діянь через спомины ролі жолніря до воєнной технолоґіі і досвіду войны. Не бракне модерных мультімедияльных і сценоґрафічных розвязань. Музей міг бы быти не лем цікавом туристичні атракцийом, але тіж добрым місцьом до приближыня богатой воєнной істориі міста його жытелям.

Винным шляком з Мадяр до Польщы

Реставратор з Ясла, Ґжеґож Схабіньскій, впал на нетипову думку. Получыл свою любов до істориі, творіня вина і кони в єдно, і так на осін выстартує з першом прогульком винным шляком на конях. Пройде она під конец вересня/септембра, по зобраню винограду на сок до вина. Подія пройде так як колиси, в брычках будут іхати участникы, а на возах бочкы з соком. Траса буде вела з мадярского Токаю або його околиц до Дуклі. Там бочкы з соком будут зложены в єдній з найстаршых камениц – Ґалицийскій Каменици, де будут лежати аж наберут одповідніх смаків. Участ в подорожы може взяти каждый. До мадярскых винниц участникы поіхают автобусом, а в страну хыжы уж на конях. Переіхают коло 200 км, зато треба ся рахувати з тым, же поворот може заняти пару дни. По дорозі заплянуваны сут пристанкы, нічлігы і одвиджаня інтересуючых місц, якы находят ся на трасі. Охочы прошены сут зголошувати ся до орґанізатора про деталі прогулькы. Подія єст платна.

«4 поры рока» – фотоґрафічный конкурс о коросняньскій земли

Етноцентр Коросняньской Землі просит до участи в фотоґрафічно-краєзнавчым конкурсі «4 поры рока». Єст то друга едиция конкурсу, а тогорічном головном темом сут «Дворы коросняньской землі». Цілю конкурсу єст заінтересувати мешканців ци туристів одвиджаючых реґіон материяльном і нематерияльном спадковином, котра ся гев находит. Змаганя пройдут в двох віковых катеґориях, вроджены медже 2004 а 2008 роком і вроджены перед 2004. Роботы мож слати до 31. серпня/авґуста тр. на адрес ЕКЗ. Зголосити мож лем єдну знимку дворку, котрый находит ся на коросняньскій земли, обовязково з описом його локализациі, істориі ци додатковыма інтересуючыма інформациями. Конкурсова капітула в каждій катеґориі оголосит три найліпшы працы, котры будут фінансово нагороджены, і три выріжніня, котры будут нагороджены річовыма нагородами. Окремо каждый участник отримат нагороду за саму участ в конкурсі. Більше деталів находит ся на офіцийным сайті ЕКЗ.

В Татрах вказали ся першы сліды збудженых з зимового сну медведів

Як поінформувал на своім фейсбуковым сайті Татряньскій Нацийональный Парк, першы сліды закінчыня зимы працівникы парку обсервували в рейоні Галі Ґонсєницовой, де збудила ся медведиця з молодым. З той причыны власти парку апелюют до туристів, предовшыткым до скітуровых лыжників тримати ся шляків, так жебы не перешкаджати пробудженым і збераючым силы медведям.