Сумар дня на 22. марця 2021 р.

Приносиме вам сумар медияльной ґрупы ЛЕМ.фм+ на ден 22. марця 2021 р.

Можливе занечыщыня воды в ріці Ропа

Бургомайстер Ґорлиц поінформувал, што в звязку зо стриманьом працы очыщальні одпадовой воды бывшой Рафінериі Ґлімар, до рікы Ропы можут ся доставати небезпечны субстанциі. Джерело воды для міста Ґорлиці єст безпечне, находит ся бо оно выже выходу очыщальні. Уряд міста просит жытелів осторожні хоснувати воду з рікы Ропы ниже выходу очыщальні, якій ся находит на высокости крижівкы ДК 28 з ул. Млиньском. Загорожыня єст монітуване в рамках воєвідского штабу кризового заряджаня, якій дотля не выпрацувал успішного розвязаня проблему. Бургомайстер зложыл повідомліня про підозріня злочыну до Рейоновой Прокуратуры в Ґорлицях, што базує на рішыню о вылучыню діяня рафінерийной очыщальні, што єст причыном реального загорожыня для здоровля і жытя люди.

Ігор Гербут номінуваный до Фридериків 2021

18. марця Фоноґрафічна Академія передала номінациі до Фридериків 2021 в катеґориях розрывкова музика і джаз. Фридерикы то нагороды признаваны од 1995 рока польскым музичным середовиском за найважнійшы осягніня на фоноґрафічным рынку в Польщы. Серед назвиск номінуваных в тым році до Фридериків нашло ся і лемківскє. Платня «Chrust» Ігоря Гербута была номінувана до нагороды в катеґориі «Альбом рока Поетична музика». «Krakowski spleen» лемківского вокалисты был номінуваный в катеґориі «Найліпше нове выконаня». В тогорічній едициі Фридериків о номінацию бороло ся 321 альбомів, 402 відеокліпы і 355 творів.

Сидур Прохожых при жыдівскым цмонтери

Памятник Сидур Прохожых в формі звізды Давида станул при жыдівскым цмонтери в Ґорлицях. Упамятнят Жыдів, котры перед II світовом войном творили близко половину популяциі міста. Як поінформувал бургомайстер Ґорлиц, Рафал Кукля, на стінах памятника поміщено парудесят старых мацев, выкопаных в 2015 спід підлогы неістнуючой уж синаґоґы Бешт при ул. Стражацкій. Бургомайстер підкрислил, што Сидур Прохожых то місце памяти о сусідах, знаємых, приятелях, людях, котры безповоротно зникнули з Ґорлиц. Місце створене єст, жебы памят о спільній істориі і страшных подіях войны ниґда не загынула. Памятник был зрыхтуваный в рамках проєкту «Ґорлиці. Минуле/Будуче – жыдівска істория спасена», на реализацию котрого місто отримало дофінансуваня з Міністерства Заграничных Справ в высокости 105 тис. злотых. Цілковитый кошт проєкту то близко 360 тис. зл. В його рамках зреализувано тіж м.ін. пленерове кіно, выклады, варштаты онляйн, заплянувано створити видный лем вчас дощу пропамятный мураль.

Гірска Одисея на Лемковині

Волонтеры Гірской Одисеі продолжают 700-кілометровый марш шляком Карпат і Судетів. Еколоґічна акция, якой цілю єст промувати прятаня гірскых пути, поділена єст на 10 етапів. Третій з них одбуде ся в днях од 26. до 28. марця тр. Участникы пройдут товды з Дуклі до Крениці, де проведена буде акция прятаня. Орґанізаторы просят вшыткых охочых долучыти до прогулькы. Не треба ся зголошувати, старчыт забрати з хыжы своі рукавичнкы. До участи прошены сут особы, котры хотят звернути увагу на проблем смітя в горах і лісах, особливо лишаный туристами плястік, небезпечный для рослин і звірят.

Майовы Дни Ґорлиц одкликаны

Містецкій Уряд в Ґорлицях поінформувал, што з огляду на новы, штораз барже рестрикцийны ограничыня і брак ясных декляраций што до іх знесіня сут змушены зрезиґнувати з орґанізациі Дни Ґорлиц в традицийным, майовым терміні. Пізнійше одкликаня імпрезы вязало бы ся з вельома консеквенциями, тіж фінансовыма. Кєд дозволит на тото епідемічна ситуация, містецкы власти плянуют перенести празднуваня Дни Ґорлиц на пізнійшый, літній термін.