Сумар дня на 22. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 22. лютого/фебруара 2024 р.

Дбайме о свою рідну бесіду

Вчера святкували сме Медженародный Ден Материньского Языка – што тіж припоминали сме в нашых социяльных медиях. Ден тот выголосила 30. Ґенеральна Конференция UNESCO в 1999 р., і од 2000 р. ден тот реґулярні припоминат цілый світ. Вальне згромаджыня ОЗН вызвало членьскы державы «жебы підтримували захованя і охрону вшыткых языків хоснуваных народами світа». Подля фаховців, актуально на світі бесідує ся понад 7 100 языками, но приблизно 40% з них є загроженых. На жаль, серед них є тіж наша бесіда – лемківскій язык. UNESCO припоминат, што освіта в материньскым языку підтримує вчыня, грамотніст і освоіня собі дальшых языків. Самособом задачом вшыткых нас є усвідомлюваня, што кєд не будеме бесідувати по свому і забудеме свій рід – наш язык пропаде.

В Русиньскым Музею припомнут родину Ільковичів

Русиньскій Музей в Пряшові кличе на выклад з презентацийом посвяченый родині Ільковичів. Стріча одбуде ся 29. лютого/фебруара о 16.00 год. в музейных просторах в Пряшові. Як інформут орґанізаторы, вчас стрічы буде ся бесідувало не лем о Діонізийови Ільковичови, але тіж і о його родичах і рідных. «Прийдте і послухайте, якій нелегкій осуд тота русиньска родина пережыла в ХХ столітю» – кличе в тот спосіб Музей. Окрем спомянутого Діонізия, стріча буде посвячена жытю і творчости Іларийона, Миколая, Марты і Алексия Ільковичів.

Акция Жіночы Польковиці

В рамках проєкту Жіночы Польковиці жены і дівчата будут мочы брати участ в подіях, якы орґанізуваны будут головно через другы жены. То предовшыткым можніст взяти участ в керамічных варштатах, творіню біжутериі, в показах мейкапу, в выставах ци стрічах зо стилістками моды – то лем частина можливтости. Ґміна Польковиці інформує, што в пропозициях целебруваня Дня Жен будут тіж безплатны проздравотны акциі. Сумарично в тогорічній акциі Жіночых Польковиц нашло ся 20 ріжных подій. Першы з них уж тырвают, а дальшы сут заплянуваны на наступны дни лютого/фебруара, аж до 21. марця. Деталі найдете на сайті www.polkowice.eu.

Кандрачова нагороджена Премійом Фра Анджеліко

Як інформувала Пресова Канцелария Конференциі Єпископів Словациі, в Братиславі в віторок 20. лютого/фебруара перевзяли Премію Фра Анджеліко – покровителя артистів, дальшы лавреаты в обшыри словесного, вытварного і музичного кумшту, котры свойом творчістю вынятково заслужыли ся для розвитку християньской культуры на Словациі. За музичну творчіст лавреатком Преміі Фра Анджеліко была нагодоржена Моніка Кандрачова, котру знаме як інтерпретаторку, яка має в своім репертуарі і русиньскы народны і духовны співанкы. Вчас подіі Моніка Кандрачова і выступувала, разом зо своім сыном, так само популярным співаком Андрийом Кандрачом. Моніка Кандрачова є на музичній сцені уж пару десяток років.