Сумар дня на 22. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 22. лютого/фебруара 2023 р.

Одкликаня представника лемківской етнічной меншыны зо складу Спільной Комісиі Уряду та Нацийональных і Етнічных Меншын

Міністерство Внутрішніх Справ і Адміністрациі подало до публичной інформациі, што в звязку зо зложыньом внеску о одкликаня представника лемківской етнічной меншыны зо складу Спільной Комісиі Уряду та Нацийональных і Етнічных Меншын, згідні з 25. арт. 3. уст. 3 пкт. уставы з дня 6. січня/януара 2005 р. о нацийональных і етнічных меншынах та о реґіональным языку зачали процедуру консультуваня зміны в складі реченой Комісиі. Писмо, жебы заняти становиско што до конечности особовой зміны, буде скєруване до орґанізаций репрезентуючых лемківску меншыну, в тым особливо до тых, котры протягом 5 послідніх років, выступували до Міністерство Внутрішніх Справ і Адміністрациі з внесками о дотациі на реализацию задач, котрых цілю єст охорона, захованя і розвиток культуровой достоменности нацийональных і етнічных меншын і розвиток реґіонального языка. По закінчыню консультаций властивый міністер до справ реліґійных конфесий та нацийональных і етнічных меншын выступит до Презеса Рады Міністрів з внеском, жебы провести одповідню зміну в складі Спільной Комісиі.

Полномічник влады закликал урядників до аплікуваня языковых прав

Меджeнародный Ден Материньского Языка, якій припадат на 21. лютого/фебруара, скоментувал полномічный влады Словацкой Республикы про нацийональны меншыны Ласло Буковскій. Підкрислил він ролю хоснуваня і захованя материньского языка в штоденным жытю членів нацийональных меншын. При нагоді звернул увагу, што як раз в меншыновым середовиску материньскій язык часто вычерят язык державы. Подля Быковского охорона материньского языка не єст яловым ділом, а і міцно повязаным з захованьом достоменности і охороном языковой ріжнорідности і культуровой спадковины. Закликал він вшыткых членів нацийональных меншын до хоснуваня своіх языковых прав во вшыткых сферах. Так само звернул ся і до представників публичного секотра, жебы окрем тых обовязків, якы становит леґіслятива, аплікували вшыткы языковы права нацийональных меншын в як найшыршым розсягу.

Што выремонтуют на Шлеску?

Іщы до 5. марця тр. мож зголошувати памятникы зо свойой околиці, котры треба і вартат выремонтувати. Початком лютого/фебурара рушыла чергова едиция конкурсу «Наш Памятник» фінансуваного Банком Державной Господаркы. Того рока в конкурсі можут брати участ жытелі м.ін. нижньошлезского воєвідства. Разом пят памятниковых будинків з пятьох воєвідств буде выремонтуваных. Набір тырват до 5. марця. При зголошыню треба пояснити, як выремонтуваный обєкт може быти пак хоснуваный льокальном соспільністю. Выграный проєкт достане од Фундациі Most the Most дофінанусваня (аж і до 1 млн зл). Чым веце зголошынь на памятник, тым векша шанса на выграну.

В Сербіі передали меншынам дофінансуваня

В понедільок 20. лютого/фебруара в Новым Саді Покрайскій Секретар дс. Освіты, Реґуляциі і Адміністрациі Нацийональных Меншын Жолт Сакалаш передал представникам 17 Совітів Нацийональных Меншын контракты на фінансуваня іх діяльности. Середкы о сумаричній вартости 61,6 млн дінарів передали на діяльніст 17 Совітів з обшыри Войводины. Грошы будут выплачены в трьох ратах до кінця того рока. Русиньска меншына достала тілько, што і влони, значыт коло 3,5 млн дінарів. Дофінансуваня перезначене буде на постійны кошты фунґуваня Совіту та на част проґрамовой діяльности – дотация покрыват єдну третю плянуваного буджету.