Сумар дня на 22. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 22. листопада/новембра 2024 р.

Владыка Мілян Лах остал апостольскым візитатором про західню Европу

Як інформувал Святійшый Престол на своім офіцияльным вебсайті, Святійшый Отец Франциск призначыл в четвер 21. листопада/новембра тр., на праздник Входу Пресвятой Богородиці до Храму, Преосвященного владыку Міляна Лаха за апостольского візитатора про словацкых грекатолицкых вірных в західній Европі. Владыка Мілян вєдно з новом функцийом остає і помічным єпископом Братиславской Єпархіі. Апостолсьскій візитатор є делеґатом папы римского, векшыном на посаді єпископа. Має уділены особливы, шырокы уповномічніня і одповідальный є лем перед Вселеньскым Архієрейом. Окрем інчого выконує обовязкы єпископа в єпархіі, де неє єпископа, або про віруных, якы не належат під даяку територияльно выділену єпархію. Веце про владыку Міляна можете прочытати в дописі на нашым портали.

Премєра лемківской оперы «Голос»

Припоминаме, што в найблизшу неділю 24. листопада/новембра в Нацийональным Форум Музикы во Вроцлаві одбуде ся премєра лемківской оперы «Голос». Одограны будут два спектаклі – о 16.00 год. і 18.30 год. «Голос» то проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Проєкт стрітил ся з барз великым заінтересуваньом, зато білеты на премєровы спектаклі барз скоро ся выпродали. Орґанізаторы заохочают слідити файнпейдж оперы в сіти Facebook, де будут поміщати евентуальны інформациі о дальщых датах концертів.

«Пісні Лемківской Краіны» во Вроцлаві

Нецілый тыжден пізнійше в Нацийональным Форум Музикы во Вроцлаві одбуде ся дальша лемківска подія. В остатню суботу місяця, 30. листопада/новембра пройде там концерт пн. «Пісні Лемківской Краіны», на котрый просит Лемківскій Ансамбль Пісні і Танця «Ластівочка» з Пшемкова. Концерт зачне ся о 18.00 год. Ансамбль запрезентує ся в традицийных лемківскых творах. Остатні доступны білеты на концерт мож купити на сайті Нацийонального Форум Музикы. Ластівочка єст ціненым і нагороджуваным колективом. Oсіню того рока отримала нагороду Соймику Нижньошлезского Воєвідства «Silesia», зас в 2023 році діяльніст ансамблю угонорувала нагорода ім. Оскара Кольберґа.

Варштаты вышываня в Рускій Бурсі

А уж заран, в суботу 23. листопада/новембра в Рускій Бурсі в Ґорлицях одбудут ся дальшы занятя в рамках Творчой Бібліотекы, циклю стріч для діти і молодежы, вчас котрых рыхтуваны сут розмаіты ручной роботы артефакты. Тым разом будут то варштаты вышываня. Початок о 12.00 год. Подія є орґанізувана завдякы дотациі Міністра Внутрішніх Справ і Адміністрациі. Вступне на варштаты дармо. Запевняме тіж материялы. Будеме мати специяльны тупы ігли, зато сміло можете приходити з дітми. Красні просиме!