Сумар дня на 22. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 22. листопада/новембра 2022 р.

«Вызва про реґіон» – проґрам, котрый дозволил одновити обєкты памятковой вартости з Пряшівщыны

Ґрантовый проґрам Пряшівского Самосправного Краю «Вызва про реґіон» уможливил реализацию дальшых проєктів тыкаючых обновы обєктів памятковой вартости. Як інформувало Одділіня Комунікациі і Пропаґациі ПСК, завдякы фінансовій підпорі в высокости 88 тис. евро подарило ся зреализувати проєкты обновы культурных памяток, м.ін. в селах Шамброн, Осадне, Брезовичка ци Камюнка. При грекокатолицкій церкви Покровы Пресвятой Богородиці в Шамброні одновлено муры. Православна церков Вознесіня Господа в Осадным перешла ремонт в середині разом з механічным очыщыньом розписів на стінах. Найбільше, бо аж 24 тис. евро дофінансуваня отримал римокатолицкій костел св. Мартина з Турс побудуваный в XIII ст., де одновлено ґотицку вежу. В Камюнці в грекокатолицкій церкви свв. Апостолів Петра і Павла одновлено фасаду і середину святыні, працы прошли тіж і вколо храму. В 2022 р. крайска самосправа посередництвом «Вызвы про реґіон» і єй проґраму Підпора одновы культурных памяток UNESCO і народной культуры підтримала аж 23 проєкты.

В Польковицях рыхтуют наступну роверову інвестицию

Самоуряд Польковиц разом з бургомайстром Лукашом Пузнєцкым просят до участи в соспільных консультациях, веденых в рамках нового проґраму «RoweLOVE Polkowice». Як підкрислил бургомайстер, надіє ся він на участ мешканців в консультациях, так жебы новы туристично-роверовы шлякы створены были спільні з жытелями ґміны. В часі стрічы проєктант запропонує вступну мапу новых трас на обшыри ґміны, разом з можливыма трасами поза ґміном в страну Любіна, Хоцянова ци Ґрембоціц. Консультациі пройдут 28. листопада/новембра о год.17.00 в Ратушы в Польковицях.

Твір Енді Варголя был выліцитуваный на нюйоркскій авкциі за понад 85 млн дулярів

Бесіда о серіґрафіці пн. «White Car Crash» створеній в 1963 р. в рамках сериі «Death and Disaster». Робота возникла в часах, коли автор зосереджал ся на темі людской смертельности. В роботі Варголь 19 разів представил образ автомобільной катастрофу в чорно-білых тонах. Єст то його найбільша праца посвячена тій темі. Як підкрислил шеф одділу модерной штукы Sotheby’s в Ню Йорку, де прошла ліцитация, серіґрафіка выріжнят ся не лем з причыны свойого розміру, але тіж богатства палеты.

В Малопольщы дбают про забыткы

Малопольскій Воєвода просит до участи в наступній едициі конкурсу «Охорона Забытків Малопольщы 2023». В тій едициі цілковита сума середків на тоту ціль то аж 4 млн зл. О фінансову підпору на проведіня консерваторскых, реставраторскых ци будовляных робіт при забытках можут ся старати властителі ци хоснувателі обєктів вписаных до реґістру забытків і находячых ся на обшыри малопольского воєвідства. Внесок і реґулямін конкурсу, а тіж вымогы находят ся на сайті www.dziedzictwo.malopolska.pl. Зголошыня приниманы сут до 15. грудня/децембра тр.

«Господарка давной Лемковины» – прелекция з Йоаном Дзюбином

Музей Бічской Землі просит на стрічу пн. «Господарка давной Лемковины», котру вюл буде Йоан Дзюбина з Лемківской Едукацийной Загороды в Ґладышові. Подія пройде в рамках акциі «Бічскы Науковы Стрічы». Прелекция тыкала буде рільничых практик і істориі економічных і социяльных змін. Стріча пройде 23. листопада/новембра о 14.00 год. в Домі з Баштом. Вступне дармо.